Hörmüz boğazında üç yük gəmisi vurulub

Xarici mənbələrə istinadən portfel.az xəbər verir ki, İran sahilləri yaxınlığında və Hörmüz boğazı bölgəsində üç yük gəmisi hücuma məruz qalıb.

Hadisə barədə UK Maritime Trade Operations (UKMTO) məlumat yayıb. Bildirilir ki, gəmilərdən biri Hörmüz boğazında naməlum mərmi ilə vurulub və nəticədə gəmidə yanğın baş verib. Ekipaj üzvləri təhlükəsizlik səbəbilə təxliyə olunub.

Digər iki gəmi isə İran sahilləri yaxınlığında Körfəz sularında zərər görüb. İlkin məlumatlara görə, hadisələr nəticəsində ölən və yaralananlar barədə məlumat yoxdur, lakin araşdırmalar davam edir.

Regionda gərginlik artır

Bu hadisələr İran müharibəsi fonunda bölgədə baş verən digər hücumların davamı hesab olunur. Məlumatlara görə fevralın sonundan bəri Hörmüz bölgəsində təxminən 10 gəmi hücuma məruz qalıb.

Hücumların bir hissəsinin dəniz minaları və ya pilotsuz sistemlər vasitəsilə həyata keçirilə biləcəyini ehtimal edilir.

Qlobal daşımaya təsir

Hücumlar nəticəsində bölgədə gəmiçilik ciddi şəkildə məhdudlaşıb. Hazırda 200-dən çox gəmi Hörmüz yaxınlığında gözləmə vəziyyətindədir.

Bir sıra böyük logistika şirkətləri, o cümlədən Maersk və MSC risklər səbəbindən bölgə üzrə bəzi daşımaları dayandırıb.

Sığorta şirkətləri də müharibə riski sığortası tariflərini kəskin şəkildə artırıb.

Hörmüz boğazında təhlükəsizlik vəziyyətinin pisləşməsi qlobal enerji və ticarət marşrutlarına ciddi təsir göstərə bilər. Çünki dünya üzrə neft və LNG tədarükünün təxminən 20%-i bu strateji marşrutdan keçir.