İran Hörmüz boğazında 3 neft tankerini hədəf aldığını açıqladı

İran İnqilab Keşikçiləri Ordusu Hörmüz boğazından keçən və onların bildirdiyinə görə, xəbərdarlıqlara məhəl qoymayan 3 neft tankerini hədəf aldığını açıqlayıb. İnqilab Keşikçiləri Hərbi Dəniz Qüvvələrinin açıqlamasında bu tankerlərin təhlükəli və qanunsuz marşrutla hərəkət etdiyi, onların dayandırılmağa məcbur edildiyi bildirilib. Həmçinin ABŞ ordusunun regiondakı müdaxilələrinin və gəmilərə yönəlmiş qanunsuz göstərişlərinin cavabsız qalmayacağı barədə xəbərdarlıq edilib.

Bundan əlavə, İran İnqilab Keşikçiləri İordaniyadakı ABŞ hava bazasını və ABŞ Mərkəzi Qüvvələr Komandanlığının (CENTCOM) qərargahını bir çox ballistik raketlə hədəf aldığını duyurub. Hücumun ABŞ ordusunun regiondakı aqressiv hərəkətlərinə cavab olaraq həyata keçirildiyi qeyd edilib. İran tərəfi ABŞ administrasiyasını təhdidlərə və müdaxilələrə son qoymağa çağırıb.

ABŞ ordusu isə bu hücum cəhdlərinin qarşısının alındığını və hücumu əvvəlcədən gözlənilməyən cəhd kimi qiymətləndirdiyini bildirib. CENTCOM hədəfə alınan yerin adını açıqlamayıb, lakin İsrail media mənbələri İranın İordaniyadakı ABŞ bazasına ballistik raket atdığını bildirib.

Bu hadisələr regionda gərginliyin artmasına səbəb olub və neft qiymətlərinin yüksəlməsinə yol açıb. Brent neftinin bir barelinin qiyməti %4,29 artaraq 87,70 dollara, WTI neftinin bir bareli isə %4,11 artaraq 82,53 dollara yüksəlib.