Bitcoin 80 min dollara yaxınlaşır

ABŞ-İran arasında atəşkəs ümidlərinin davam etməsi kriptovalyuta bazarında risk iştahını artıraraq investorların Bitcoinə marağını gücləndirib.

Bitcoin bazar ertəsi təxminən 2% bahalaşaraq 79 500 dollar səviyyəsinə qədər yüksəldi və yanvarın sonundan bəri ilk dəfə 80 min dollarlıq psixoloji həddə yaxınlaşdı. Bu yüksəliş İranın Hörmüz boğazının yenidən açılması ilə bağlı təklif verə biləcəyi xəbərlərindən sonra enerji bazarlarında gərginliyin azalması fonunda baş verdi. Tərəflər məlumatı rəsmi təsdiqləməsə də, bazarlar xəbərlərə sürətlə reaksiya verdi. Ether də təxminən 1,7% artaraq kriptobazarda ümumi optimizmin gücləndiyini göstərdi.

Rallinin mühüm hissəsi “short covering”, yəni qiymət artdıqca treyderlərin açdıqları qısa mövqeləri bağlaması ilə bağlıdır. Bu proses aktivin geri alınmasını tələb etdiyindən qiymət artımını sürətləndirir. Eyni zamanda institusional axınlar da yaxşılaşıb: ABŞ-da listinqdə olan spot Bitcoin ETF-lərinə bu ay təxminən 2,5 milyard dollar vəsait daxil olub və bu göstərici mart ayını iki dəfə üstələməyə doğru gedir. Bundan əlavə, böyük Bitcoin yığıcısı Strategy təkcə aprel ayında təxminən 3,9 milyard dollarlıq Bitcoin alıb ki, bu da son bir ilin ən böyük aylıq alışıdır.

Aprel ayı ümumilikdə Bitcoin üçün güclü keçib. Aktiv ay ərzində təxminən 16% bahalaşaraq 2025-ci ilin mayından bəri ilk iki rəqəmli aylıq artıma yaxınlaşır. Bu cür dinamika trend izləyən investorları və bazara kənardan baxan kapitalı cəlb edir. Hörmüz boğazı ilə bağlı gərginliyin bir qədər azalması nəticəsində neft qiymətlərinin geri çəkilməsi də riskli aktivlərə dəstəyi artırıb. Atəşkəs optimizmi davam edərsə, bazar iştirakçıları 80 min dollar səviyyəsini sınaqdan keçirməyə davam edəcək; bu hədd aşılarsa, bazar narrativi bərpadan real “breakout” mərhələsinə keçə bilər, əks halda isə konsolidasiya yenidən gündəmə gələ bilər.