Edra startapı 30 milyon dollar investisiya cəlb edib

Palantir-in iki keçmiş əməkdaşı tərəfindən təsis edilmiş Nyu-York mərkəzli Edra startapı 18 mart 2026-cı il tarixində gizli rejimdən çıxaraq 30 milyon dollarlıq Series A investisiya raundunu açıqlayıb. Raunda Sequoia Capital rəhbərlik edib.

Şirkətin həmtəsisçisi Eugen Alpeza Palantir-də kommersiya müştəriləri üzrə fəaliyyətə və Sİ Platformasının istifadəyə verilməsinə rəhbərlik edib. Digər həmtəsisçi Yannis Karamanlakis isə şirkətin ilk Forward Deployed AI Engineer-i kimi Sİ həllərinin təqdimatdan real tətbiq mərhələsinə keçirilməsində mühüm rol oynayıb.

Təsisçilər 13 il əvvəl universitetdə tanış olub və məlumat əsaslı əməliyyatlar sahəsində geniş praktiki təcrübəyə malikdirlər.

Edra şirkətlərin əməliyyat məlumatlarını (e-poçtlar, sistem qeydləri (loglar), dəstək sorğuları və daxili yazışmaları) toplayaraq avtomatik şəkildə “canlı bilik bazası” formalaşdırır və onu davamlı olaraq yeniləyir.

Bu yanaşma parçalanmış və strukturlaşdırılmamış məlumatları funksional Sİ agentlərinə çevirərək iş proseslərinin avtomatlaşdırılmasına imkan yaradır. Həll xüsusilə böyük həcmdə məlumatla işləyən müəssisələr üçün nəzərdə tutulub.

İnvestisiya raunduna Sequoia Capital rəhbərlik edib, həmçinin 8VC və Kevin Hartz-ın A* fondu da iştirak edib. Bu, Palantir-dən ayrılan komandaların qurduğu startaplara investor marağının yüksək olduğunu göstərir.

Cəlb edilən vəsait məhsulun genişləndirilməsinə və yeni işçi heyətinin formalaşdırılmasına yönəldiləcək. Bu addım əməliyyat Sİ həllərinə artan tələbat fonunda şirkətin böyüməsini sürətləndirməyi hədəfləyir.