GitLab səhmləri maliyyə hesabatını açıqladıqdan sonra düşüb

xarici mənbələrə istinadən portfel.az xəbər verir ki, ABŞ-ın proqram təminatı şirkəti GitLab Inc. 2026 maliyyə ilinin dördüncü rübü üzrə gözləntiləri üstələyən maliyyə nəticələri açıqlayıb. Buna baxmayaraq, şirkətin növbəti maliyyə ili üçün təqdim etdiyi zəif proqnoz investorların narahatlığına səbəb olub və səhmlərin ticarətdən sonra ucuzlaşmasına gətirib çıxarıb.

Şirkətin 31 yanvar 2026 tarixində başa çatan rüb üzrə gəliri 260,4 milyon dollar təşkil edib. Bu göstərici analitiklərin 252 milyon dollar səviyyəsində olan proqnozunu üstələyərək illik müqayisədə 23 faiz artım göstərib. Düzəliş edilmiş mənfəət isə səhm başına 0,30 dollar olub ki, bu da gözlənilən 0,23 dolları geridə qoyub. GitLab həmçinin ilk dəfə illik təkrarlanan gəlirin (ARR) 1 milyard dollar səviyyəsini keçdiyini açıqlayıb. Rüb ərzində şirkətin non-GAAP əməliyyat gəliri 53,4 milyon dollara çatıb və əməliyyat marjası 20,5 faiz təşkil edib.

Şirkətin müştəri bazası da artmağa davam edib. İllik 5 min dollardan çox gəlir gətirən müştərilərin sayı 10 682-yə yüksəlib və bu kateqoriya ümumi gəlirin böyük hissəsini formalaşdırır. İllik 100 min dollardan çox gəlir gətirən müştərilərin sayı isə 1 076-ya çataraq illik müqayisədə 33 faiz artım göstərib. GitLab həmçinin səhmdarlar üçün 400 milyon dollarlıq səhm geri alım proqramını təsdiqləyib.

Şirkətin bütün 2026 maliyyə ili üzrə gəliri 955,2 milyon dollar olub və bu göstərici əvvəlki illə müqayisədə 26 faiz artım deməkdir. Düzəliş edilmiş sərbəst pul axını isə 83 faiz artaraq 220 milyon dollara yüksəlib.

Bununla belə, investorların diqqətini əsasən GitLab rəhbərliyinin 2027 maliyyə ili üçün açıqladığı proqnoz çəkib. Şirkət gəlirin 1,099 milyard dollardan 1,118 milyard dollaradək olacağını gözləyir ki, bu da təxminən 15-17 faiz artım deməkdir və bazar gözləntilərindən aşağı hesab olunur. Eyni zamanda non-GAAP mənfəətin səhm başına 0,76-0,80 dollar intervalında olacağı proqnozlaşdırılıb.

Şirkət rəhbərliyi növbəti maliyyə ilini “keçid ili” kimi qiymətləndirir. Bu, dövlət sektorunda bəzi müqavilələrin gecikməsi, kiçik və orta biznes müştəriləri arasında qiymət həssaslığının artması və süni intellekt əsaslı məhsulların gəlirə təsirinin daha gec formalaşması ilə əlaqələndirilir. GitLab həmçinin strategiyasını daha böyük korporativ müştərilərə yönəltməyi planlaşdırır ki, bu da qısamüddətli artım tempini bir qədər zəiflədə bilər.

Analitiklər güclü rüb nəticələrinə baxmayaraq, zəif proqnoz səbəbindən bəzi qiymət hədəflərini aşağı salıblar. Bununla belə, bazarda ümumi konsensus hələ də müsbət qalır və bir çox analitik GitLab səhmləri üçün “alış” tövsiyəsini saxlayır.