Marvell 540 milyon dollarlıq satınalma edir

Marvell Technology XConn Technologies-i təxminən 540 milyon dollara almağa razılaşdı

Marvell Technology süni intellekt üçün məlumat mərkəzi infrastrukturunda mövqeyini gücləndirmək məqsədilə şəbəkə və bağlantı çipləri istehsalçısı XConn Technologies-i təxminən 540 milyon dollar dəyərində sövdələşmə ilə almağa razılaşıb.

Razılaşmaya əsasən, ödənişin təxminən 60 faizi nağd, 40 faizi isə səhmlərlə ediləcək. Səhm hissəsi Marvell-in 20 günlük həcm-çəki ortalama qiymətinə əsaslanacaq və bu, təxminən 2,5 milyon MRVL səhminə bərabərdir. Sövdələşmənin 2026-cı ilin əvvəlində tənzimləyici təsdiqlərdən sonra bağlanması gözlənilir.

XConn əsasən PCIe və CXL açarları (switches) hazırlayır. Bu çiplər böyük miqyaslı süni intellekt və bulud serverlərində sürətləndiricilərin və yaddaşın bir-biri ilə əlaqələndirilməsi üçün istifadə olunur. Şirkətin PCIe 5 / CXL 2.0 məhsulları artıq istehsaldadır, PCIe 6 / CXL 3.1 nəsli isə 20-dən çox müştəri ilə sınaq mərhələsindədir.

Marvell bu addımla, tək şkaflı sistemlərdən çoxşkaqlı süni intellekt klasterlərinə keçid fonunda, yüksək ötürmə qabiliyyətli və ultra-aşağı gecikməli “scale-up” bağlantı həlləri sahəsində mövqeyini gücləndirməyi hədəfləyir. Marvell-in SerDes texnologiyaları, CXL yaddaş kontrollerləri və UALink yanaşması XConn-un switch həlləri ilə birləşdirilərək hipermiqyaslı məlumat mərkəzləri üçün ən geniş CXL/PCIe bağlantı portfellərindən birinin yaradılması planlaşdırılır.

Şirkətin proqnozuna görə, XConn-un məhsulları 2027-ci maliyyə ilinin ikinci yarısından etibarən gəlir gətirməyə başlayacaq və 2028-ci maliyyə ilində təxminən 100 milyon dollar səviyyəsinə çatacaq. Həmin mərhələdə bu alışın Marvell-in qeyri-GAAP mənfəətinə müsbət təsir göstərəcəyi gözlənilir.