TSMC 2 trilyon dollarlıq “elit klub”a qoşuldu

Taiwan Semiconductor Manufacturing Company (TSMC) tarixində ilk dəfə olaraq bazar kapitallaşmasını 2 trilyon dollar həddini aşaraq qlobal korporativ reytinqdə altıncı ən dəyərli şirkətə çevrilib. Tayvanlı çip istehsalçısı bu göstərici ilə Amazon-dan geri, lakin Meta Platforms və Broadcom-u qabaqlayır.

TSMC səhmlərinin kəskin yüksəlişi əsasən süni intellekt çiplərinə olan partlayışvari tələblə əlaqələndirilir. Şirkətin səhmləri təxminən 390 dollar səviyyəsinə yüksəlib və son beş ildə 208% artım nümayiş etdirib.

2026-cı ilin yanvar ayında gəlir 401,3 milyard Tayvan dollarına (təxminən 12,7 milyard ABŞ dolları) çatıb ki, bu da illik müqayisədə 36,8% artım deməkdir. Göstərici yüksək performanslı hesablama (HPC) seqmentində güclü sifarişlər fonunda bazar proqnozlarını üstələyib.

Analitiklər TSMC-nin 2025-ci ildə qlobal “foundry” bazarında 67% paya malik olmasını və əməliyyat effektivliyini əsas üstünlük kimi göstərirlər. Şirkətin təxminən 60%-ə yaxın ümumi mənfəət marjası sektor üçün olduqca yüksək hesab olunur.

TSMC 2026-cı ildə kapital xərclərini 52–56 milyard dollar səviyyəsində planlaşdırır ki, bu da 2025-ci illə müqayisədə artım deməkdir. Sərmayələrin əsas istiqamətləri 2 nanometrlik texnologiyanın genişləndirilməsi və AI infrastrukturu üçün qabaqcıl paketləmə (advanced packaging) güclərinin artırılmasıdır.

Şirkət, həmçinin ABŞ-da genişlənmə planlarını davam etdirir. Bu çərçivədə Arizonada beş yeni müəssisənin tikintisi nəzərdə tutulur. Layihə Tayvanın ümumilikdə 150 milyard dollarlıq investisiya təşəbbüsünün bir hissəsi kimi qiymətləndirilir.

TSMC gəlirlərin illik 25–30% artacağını proqnozlaşdırır. Artımın əsas drayverləri arasında Nvidia, Apple və Tesla kimi iri müştərilərin AI və yüksək məhsuldarlıqlı çiplərə tələbi göstərilir.

TSMC-nin 2 trilyon dollarlıq həddi aşması yalnız bazar kapitallaşması baxımından simvolik uğur deyil, həm də süni intellekt infrastrukturunun qlobal iqtisadiyyatda mərkəzi rolunun təsdiqi kimi qiymətləndirilir.

Şirkətin gələcək dinamikası AI sərmayələrinin davamlılığından, texnoloji liderliyini qoruma qabiliyyətindən və geosiyasi risklərin idarə edilməsindən asılı olacaq.