Volkswagenin gəlirləri yarıbayarı azalıb

xarici KİV-ə istinadən portfel.az xəbər verir ki, Almaniyanın avtomobil istehsalçısı Volkswagen Group 2025-ci il üzrə maliyyə nəticələrini açıqlayıb və şirkətin mənfəətində ciddi azalma qeydə alınıb.

Şirkətin açıqladığı hesabatlara görə, qrupun satış gəliri 2024-cü ildəki 324,65 milyard avrodan 2025-ci ildə 0,8% azalaraq 322 milyard avroya düşüb.

Eyni zamanda, şirkətin fəaliyyət mənfəəti 54% azalaraq 8,9 milyard avro, xalis mənfəəti isə 44,3% geriləyərək 6,9 milyard avro olub.

Mənfəət marjası da əhəmiyyətli dərəcədə aşağı düşüb. 2024-cü ildə 5,9% olan marja 2025-ci ilin sonunda 2,8%-ə enib.

Şirkətin avtomobil satışları isə nisbətən stabil qalıb. Qrup üzrə ümumi avtomobil təhvil-təslimi əvvəlki illə müqayisədə 0,2% azalaraq 9 milyon 22 min ədəd təşkil edib.

Volkswagen-in mənfəətindəki kəskin azalma bir neçə əsas faktorla əlaqələndirilir. Bunlara ABŞ-da tətbiq olunan yüksək gömrük rüsumları, Çin bazarında artan rəqabət və Porsche markasında həyata keçirilən strateji dəyişikliklər daxildir.

Şirkət portfelinə Audi, Bugatti, Seat, Skoda və Porsche kimi markalar daxildir.

Xüsusilə Çin bazarında struktur dəyişiklikləri və yerli istehsalçıların güclənməsi səbəbindən şirkətin bu regiondakı satışları 6% azalıb.

Porsche brendinin məhsul strategiyasında dəyişiklik və elektrik avtomobilləri üzrə planların yenilənməsi isə milyardlarla avro həcmində dəyər azalması və əlavə xərclərə səbəb olub. Eyni zamanda, aşağı marjalı elektrik avtomobillərinin satışının artması və elektromobillərə keçidin gözləniləndən daha yavaş getməsi də şirkətin gəlirliliyinə mənfi təsir göstərib.

Volkswagen qrupunun maliyyə direktoru Arno Antlitz bildirib ki, 2025-ci il şirkət üçün geosiyasi gərginliklər, gömrük tarifləri və güclü rəqabət şəraitində keçib. Onun sözlərinə görə, yenidən strukturlaşma prosesi davam edir və pul axını gözləntilərdən daha yaxşı olub.

Şirkət 2026-cı il üçün daha optimist proqnoz verir. Qrup gəlirlərinin 3%-ə qədər artacağını gözləyir və fəaliyyət mənfəəti marjasını 4–5,5% aralığına qaldırmağı hədəfləyir.

Bununla yanaşı, şirkət rəhbərliyi səhmdarlara ödəniləcək dividendlərin 2024-cü illə müqayisədə 17% azaldılmasını təklif etməyi planlaşdırır.