Qızıl üzrə proqnozlar yenilənir: Hansı qurum gözləntisini necə dəyişdi?
Qızıl bazarında son həftələrdə müşahidə olunan dalğalı hərəkət tədricən məhdud diapazonda konsolidasiya ilə əvəzlənib. Lakin qiymət qrafiklərində nisbi sabitlik müşahidə olunsa da, beynəlxalq maliyyə institutlarının 2026-cı ilin sonu üçün proqnozları dinamik şəkildə yuxarı istiqamətdə yenilənməkdə davam edir. Son bir ayda bir sıra iri bank və investisiya qurumları qızılın unsiya qiyməti ilə bağlı gözləntilərinə ciddi yenilənmələr ediblər.
Bank of America əvvəlki proqnozunda 2026-cı ilin sonu üçün qızılın unsiya qiymətini 4 500 dollar səviyyəsində görürdü. Lakin bankın son qiymətləndirməsində bu rəqəm kəskin şəkildə artırılaraq 5 750 dollara yüksəldilib.
Citi yanvarın 7-də açıqladığı hesabatda ilin sonu üçün 3 700 dollar səviyyəsini proqnozlaşdırmışdı. Təxminən bir həftə sonra bu gözlənti 4 200 dollara qaldırıldı və fevralın 20-də verilən son proqnozda da həmin səviyyə qorunub saxlanıldı.
Julius Baer yanvarın 5-də 4 500 dollarlıq proqnoz açıqlamışdı. Bankın son yenilənmiş qiymətləndirməsində isə 2026-cı ilin sonu üçün gözlənti 5 000 dollara yüksəldilib.
Morgan Stanley bazarda daha sabit mövqeyi ilə seçilir. 2025-ci il dekabrın 8-də açıqlanan 4 500 dollarlıq proqnoz bir həftə sonra 4 800 dollara qaldırılıb və bank hazırda da bu səviyyəni qüvvədə saxlayır.
Standard Chartered (StanChart) 2025-ci ilin noyabrında 4 750 dollar proqnoz vermiş, yanvarın sonunda bu rəqəmi 5 150 dollara yüksəltmişdi. Fevralın ortalarında açıqlanan son hesabatda da həmin səviyyə dəyişdirilməyib.
Son dövrün ən iddialı yuxarı reviziyası isə JPMorgan Chase tərəfindən edilib. Bank yanvarın 23-də 2026-cı ilin sonu üçün 5 055 dollar proqnozlaşdırmışdı. Fevralın 16-da isə bu gözlənti 6 300 dollara qədər qaldırıldı və JPMorgan hazırda bazarda ən yüksək proqnoz verən qurum kimi önə çıxır.
MPS Capital Services daha mühafizəkar mövqedən çıxış etsə də, fevralın 16-da ilk dəfə 2026-cı ilin sonu üçün 5 500 dollarlıq proqnoz açıqlayıb ki, bu da nisbətən yüksək səviyyə hesab olunur.
Westpac Banking Corporation əvvəl 4 430 dollar proqnozlaşdırsa da, son sürətli yeniləmə ilə gözləntisini 5 570 dollara yüksəldib.
Intesa Sanpaolo yanvarda 4 100 dollar səviyyəsini gözlədiyini bildirmişdi. Fevral proqnozunda isə bu rəqəm 4 800 dollara qaldırılıb.
Goldman Sachs yanvar ayında ilkin olaraq 4 815 dollar proqnoz verib, daha sonra bu səviyyəni 5 308 dollara yüksəldib. Fevral ayında açıqlanan son hesabatda da həmin rəqəm saxlanılıb.
Proqnozunu dəyişməyən nadir qurumlardan biri Macquarie Group olaraq qalır. Şirkət 2026-cı ilin sonu üçün qızılın unsiya qiymətini 4 200 dollar səviyyəsində görür.
Ən kəskin yuxarı korrektələrdən biri isə UBS tərəfindən edilib. Bank 2025-ci ilin dekabrında 4 300 dollar proqnozlaşdırdığı halda, yanvarın sonunda bu rəqəmi 1 600 dollar artıraraq 5 900 dollara çatdırıb.
Bazardakı ikinci ən yüksək proqnoz isə Deutsche Bank-a məxsusdur. Bank yanvarın 22-də 4 500 dollar səviyyəsi açıqlamış, cəmi dörd gün sonra bu rəqəmi 6 000 dollara yüksəltmişdi.
Beləliklə, qlobal maliyyə institutlarının əksəriyyəti 2026-cı ilin sonu üçün qızıl üzrə gözləntilərini nəzərəçarpacaq dərəcədə yuxarı korrektə edib. Bu isə bazarda uzunmüddətli perspektivdə qiymətlərin yüksəliş potensialına dair optimist mövqenin gücləndiyini göstərir.