Sinkin qiyməti ton üçün 3.907 dollara yüksəldi

Sink qiymətləri regional təklif sıxıntısı ilə bağlı narahatlıqlar və artan spekulyativ alışlar fonunda altıncı ticarət günündə də yüksəlişini davam etdirərək ton üçün 3.907 dollara çatıb. Bu səviyyə 2022-ci ilin iyunundan bəri qeydə alınan ən yüksək qiymət kimi qiymətləndirilir. İlin əvvəlindən bəri təxminən 25 faiz dəyər qazanan sinkdə spot və fyuçers qiymətləri arasındakı mükafat isə ton üçün 132 dollara yüksələrək təklif çatışmazlığını təsdiqləyib.

Fiziki bazardakı göstəricilər spot qiymətlərin fyuçers qiymətlərindən yuxarı qalması ilə yaxın müddətli tələb təzyiqinin və təklif məhdudiyyətlərinin güclü əlaməti olan “bekvordasiya” siqnalı verib. Bu vəziyyət bazarda təklifin son dərəcə məhdud olduğunu göstərir.

Bununla yanaşı, digər baza metallarında daha sakit dinamika müşahidə olunub. Mis qiymətləri sabit qalarkən, alüminium, nikel, qalay və qurğuşun kimi metalların qiymətlərində cüzi dalğalanmalar baş verib.

London Metal Birjasında (LME) ticarət olunan metallar gün içi maksimumlara yaxın səviyyələrdə olarkən, sink qiymətindəki sürətli artım investorların diqqətini cəlb edir.