ABŞ-İran razılaşması İsveçrədə imzalanacaq

ABŞ ilə İran arasında əldə olunan razılaşmanın rəsmi imza mərasimi 19 iyun 2026-cı ildə İsveçrənin Bürgenstock qəsəbəsində keçiriləcək. İsveçrə Xarici İşlər Nazirliyi ABŞ, İran, Pakistan və Qətər ilə yaxın təmaslar nəticəsində imza mərasimi üçün zəruri diplomatik və logistika hazırlıqlarının tamamlandığını açıqlayıb. Bürgenstockun imza üçün hər iki tərəf, eləcə də vasitəçilər tərəfindən təklif olunduğu bildirilib.

İran xarici işlər nazirinin müavini Məcid Taxt Rəvançi mərasimdə İran parlamentinin sədri Məhəmməd Baqir Qalibaf və ABŞ vitse-prezidenti JD Vance-in iştirak edəcəyini açıqlayıb. Pakistanın baş naziri Şahbaz Şərif və İran xarici işlər nazirinin müavini Kazım Qəribabadi də razılaşma əldə olunduğunu və imza mərasiminin İsveçrədə keçiriləcəyini təsdiqləyib.

ABŞ Prezidenti Donald Trump razılaşmanın tamamlandığını, Hörmüz boğazının yenidən açılacağını və ABŞ-nin dəniz blokadasını ləğv edəcəyini bildirib. Razılaşmanın Livanı da əhatə etməsi İsraildə müzakirələrə səbəb olub. İsrailin baş naziri Benyamin Netanyahu və müdafiə naziri Yisrael Katz Livanın cənubundakı işğal altında olan ərazilərdən çəkilməyəcəklərini açıqlayıb.