Əli Əsədov Daşkənddə İslam Sivilizasiyası Mərkəzində olub

Azərbaycanın Baş naziri Əli Əsədov Özbəkistana rəsmi səfəri çərçivəsində Daşkənddə İslam Sivilizasiyası Mərkəzində olub. Ona mərkəzin fəaliyyəti, sərgiləri, elmi və təhsil layihələri, eləcə də İslam dünyasının mənəvi irsinin qorunması istiqamətində görülən işlər barədə məlumat verilib.

İslam Sivilizasiyası Mərkəzi Özbəkistanda mühüm mədəni və elmi müəssisədir. Mərkəz Mərkəzi Asiya xalqlarının elmə, təhsilə, mədəniyyətə və İslam sivilizasiyasına töhfələrini əks etdirən materialların toplandığı məkan kimi fəaliyyət göstərir. Səfər zamanı Baş nazir Əsədov regionun görkəmli mütəfəkkirlərinə, alimlərinə və ilahiyyatçılarına həsr olunmuş sərgilərlə tanış olub, mərkəzdə tətbiq edilən müasir rəqəmsal həlləri izləyib.

Özbəkistan rəhbərliyinin təşəbbüsü ilə yaradılan mərkəz regionun zəngin tarixi irsini qlobal miqyasda tanıtmaqla keçmişlə gələcək arasında körpü qurmağı hədəfləyir. O, həm muzey, həm də tədqiqat müəssisəsi kimi fəaliyyət göstərir və beynəlxalq akademik əməkdaşlığı təşviq edir.

Baş nazir Əli Əsədov Daşkənddə 5-ci Daşkənd Beynəlxalq İnvestisiya Forumunda iştirak etmək üçün səfərdədir. Forum iqtisadi əlaqələrin gücləndirilməsinə və regiona xarici investisiyaların cəlb edilməsinə yönəlib.