Ermənistan məhkəməsi Robert Koçaryan barəsində iki aylıq həbs seçib

Ermənistanın Antikorrupsiya Məhkəməsi keçmiş prezident Robert Koçaryan barəsində iki aylıq məhkəməyədək həbs qətimkan tədbiri seçib. Qərar yüksək səviyyəli korrupsiya və vəzifə səlahiyyətlərindən sui-istifadə iddiaları ilə bağlı hüquqi proseslərdən sonra qəbul edilib. Koçaryana qarşı irəli sürülən ittihamlar iri miqyaslı çirkli pulların yuyulması, vəzifə səlahiyyətlərindən sui-istifadə və böyük məbləğdə rüşvət almağı əhatə edir.

Hakim Sarkis Dadoyanın sədrliyi ilə keçirilən məhkəmə iclası zamanı Koçaryan səhhəti ilə bağlı problemlərə görə xəstəxanaya aparılıb. Proses onun iştirakı olmadan davam etdirilib. İstintaq orqanlarının iddiasına görə, Koçaryan prezident olduğu dövrdə digərləri ilə əlbir olaraq dövlətə məxsus və iqtisadi baxımdan dəyərli aktivləri bazar qiymətindən xeyli aşağı məbləğə əldə etməyə çalışıb.

Davam edən cinayət istintaqı çərçivəsində Koçaryan və oğlu da daxil olmaqla, ümumilikdə altı nəfər saxlanılıb. Robert Koçaryan 1998-ci ildən 2008-ci ilədək Ermənistanın ikinci prezidenti olub. Onun siyasi karyerası mübahisələrlə yadda qalıb. Xüsusilə 2008-ci ildə Yerevanda seçkilərdən sonra baş verən iğtişaşlar nəticəsində bir neçə nəfər həlak olub və ölkədə uzunmüddətli siyasi qeyri-sabitlik yaranıb.