İran və Oman Hörmüz boğazı üzrə razılaşmanı yekunlaşdırır

İran və Oman Hörmüz boğazında təhlükəsiz dəniz marşrutu müəyyən etmək üçün razılaşmanın son mərhələsinə çatıb. Razılaşmanın qısa müddət ərzində Beynəlxalq Dəniz Təşkilatına bildirilməsi gözlənilir. İran Xarici İşlər Nazirliyinin sözçüsü İsmayıl Bəqayi Tehranda keçirilən mətbuat konfransında iki ölkənin məsələ ilə bağlı ciddi danışıqlar apardığını bildirib.

Bəqayi ABŞ-nin İrana tətbiq etdiyi dəniz blokadasını və “iqtisadi müharibə”ni tənqid edib. O, bu addımların yalnız İrana deyil, bütün beynəlxalq ictimaiyyətə, azad ticarətə və Birləşmiş Millətlər Təşkilatının Nizamnaməsinə hücum olduğunu savunub. Bölgədə yaşanan gərginliyin ABŞ və İsrailin hərəkətlərindən qaynaqlandığını deyən Bəqayi, ticarət gəmilərinə hücumların ABŞ tərəfindən başladıldığını iddia edib. İranın beynəlxalq hüquqa əsaslanaraq qanuni özünümüdafiə hüququndan istifadə etməyə davam edəcəyi vurğulanıb.

Qatarda həbsdə olan üç iranlı pilotun vəziyyəti də yaxından izlənilir. Texniki heyətin Qatara səfər etdiyi, danışıqların davam etdiyi, Qətər nümayəndə heyətinin ötən şənbə Tehranda xarici işlər naziri Abbas Əraqçi ilə görüşdüyü bildirilib. Gərginliyi azaltmaq məqsədilə Oman və Pakistan nümayəndə heyətlərinin də ötən həftə Tehrana səfər etdiyi qeyd olunub.

Sözçü Cənubi Koreyanın Hörmüz boğazında hərbi mövcudluq göstərməsi halında bu cür addımların bölgədəki problemləri daha da mürəkkəbləşdirəcəyini bildirib. O, ABŞ-nin strategiyalarına qoşulmağın “təcavüzə şərik olmaq” anlamına gələcəyini deyib.