Rusiya Belarusa nüvə sursatları çatdırıb

Rusiya genişmiqyaslı nüvə təlimləri çərçivəsində Belarusiya nüvə sursatları çatdırıb. Bu barədə Rusiya Müdafiə Nazirliyi açıqlama verib. Çərşənbə axşamı başlayıb üç gün davam edən təlimlər Moskvanın Ukraynaya görə Qərblə davam edən qarşıdurması fonunda Rusiya və Belarusiya ərazisində keçirilir.

Belarusiyadakı raket bölməsi mobil “İskəndər-M” taktiki raket sistemi üçün xüsusi sursatların qəbulunu məşq edir. Təlimlərə sursatların buraxılış qurğularına yüklənməsi və buraxılışa hazırlıq üçün təyin olunmuş ərazilərə gizli hərəkət daxildir. NATO-da “SS-26 Stone” kimi tanınan “İskəndər-M” 500 kilometr (300 mil) məsafəyə qədər uçuş imkanına malikdir. Sistem həm adi, həm də nüvə döyüş başlıqları daşıya bilir. O, sovet dövrünə aid “Scud” raketini əvəz edib.

Ukraynadakı münaqişə zamanı Rusiya Prezidenti Vladimir Putin Qərbin Kiyevə dəstəyinə xəbərdarlıq kimi Rusiyanın nüvə imkanlarını tez-tez vurğulayıb.

Gərginlik NATO üzvləri Litva və Polşa arasında yerləşən Rusiyanın Kalininqrad anklavı ətrafında da artıb. Kreml Litvanın xarici işlər nazirinin NATO-nun Kalininqrada nüfuz etmək qabiliyyətini nümayiş etdirməli olduğunu bildirən son açıqlamalarını tənqid edib. Moskva bu fikirləri “dəlilik həddinə yaxın” kimi qiymətləndirib. Təxminən 1 milyon əhalisi olan Kalininqrad yüksək səviyyədə hərbiləşdirilib və Rusiyanın Baltik Donanmasının qərargahı kimi fəaliyyət göstərir.