ABŞ bazarları Trampın qərarından sonra yüksəlib

ABŞ Prezidenti Donald Trampın İrana qarşı planlaşdırılan zərbələri təxirə salmasından sonra ABŞ fond bazarları üzrə fyuçerslər 2%-dən çox artıb.

Bazar ertəsi səhər saatlarında Dow Jones fyuçersləri 2,1% artaraq təxminən 46 800 bəndə çatıb. S&P 500 fyuçersləri 2,2% yüksələrək 6 680 bənd, Nasdaq-100 fyuçersləri isə 2,4% artaraq 24 500 bənd səviyyəsinə yüksəlib.

Bu artım əvvəlki günlərdə müşahidə olunan enişləri kompensasiya edib və bazarlarda “risk-on” əhval-ruhiyyəsinin formalaşdığını göstərib.

Donald Tramp bildirib ki, İranla aparılan danışıqlar “çox yaxşı və məhsuldar” keçir və bu səbəbdən ölkənin enerji obyektlərinə qarşı planlaşdırılan zərbələr beş gün müddətinə dayandırılıb.

Bu qərar Hörmüz boğazının açılması ilə bağlı əvvəl verilmiş 48 saatlıq ultimatumdan sonra qəbul edilib. Qeyd edək ki, bu boğaz dünya neft tədarükünün təxminən 20%-nin keçdiyi əsas marşrutdur.

İran isə ABŞ və İsrailin enerji infrastrukturuna, o cümlədən strateji obyektlərə cavab zərbələri endirə biləcəyi barədə xəbərdarlıq edib.

Zərbələrin təxirə salınması enerji böhranı riskinin azalacağına dair gözləntiləri gücləndirib. Bu fonda həm səhmlər, həm də sənaye metallarında artım müşahidə olunub.

Asiya bazarları qərardan əvvəl zəif dinamika göstərsə də, ABŞ bazarları qlobal bərpa prosesinə liderlik edir.

İnvestorlar hazırda Hörmüz boğazının açılması ilə bağlı inkişafları və enerji qiymətlərinin inflyasiyaya təsiri fonunda FED-in növbəti addımlarını diqqətlə izləyir.