BƏƏ birjaları hücumlardan sonra kəskin düşüb

İranın həftəsonu Birləşmiş Ərəb Əmirliklərinə (BƏƏ) raket və dron hücumlarından sonra iki gün bağlı qalan Dubay və Əbu-Dabi fond birjaları 4 mart 2026-cı il tarixində yenidən açıldıqda kəskin eniş qeydə alınıb.

Dubay əsas indeksi 4,9% geriləyib və bu, 2022-ci ilin may ayından bəri ən böyük eniş kimi qeydə alınıb.

Əbu-Dabi əsas indeksi isə 3-3,6% azalaraq avqust ayından bəri ən böyük düşüşünü göstərib.

Nasdaq UAE 20 indeksi də 4,3% aşağı düşüb.

Birjalar ticarətə yenidən başladıqdan sonra qiymətlərin kəskin enişini məhdudlaşdırmaq üçün müvəqqəti olaraq 5%-lik aşağı qiymət limiti tətbiq edilib. Ticarətin bərpası İranın hücumlarının yaratdığı ziyanın qiymətləndirilməsindən sonra həyata keçirilib. Hücumlar zamanı ölkədə hava limanları, liman infrastrukturu və bəzi texnologiya obyektlərinə zərər dəymişdi.

Dubay bazarında Emirates NBD səhmləri 5,2%, Air Arabia isə 5% ucuzlaşıb. Aviasiya sektorunda eniş əsasən hava məkanında yaranan qeyri-müəyyənlik və uçuşların pozulması ilə əlaqələndirilir.

Əbu-Dabi bazarında isə Buh National Insurance 9%, U Al Qaiwain Investments 8%, First Abu Dhabi Bank isə təxminən 5% geriləyib.

BƏƏ Kapital Bazarları Tənzimləyici qurumu 2-3 mart tarixlərində fond birjalarının fəaliyyətini dayandırmışdı. Məqsəd ABŞ və İsrailin İrana qarşı hücumları nəticəsində regionda yaranan gərginliyin maliyyə bazarlarına təsirini qiymətləndirmək idi.

Analizlərə əsasən münaqişə uzun müddət davam edərsə, BƏƏ iqtisadiyyatında xüsusilə daşınmaz əmlak və bank sektorları daha çox zərər görə bilər. Citi bankının qiymətləndirməsinə görə Emaar və Aldar kimi daşınmaz əmlak şirkətləri, həmçinin iri banklar xarici kapital axınının azalması və mənfəət artım tempinin zəifləməsi ilə üzləşə bilər.