BYD-nin satış artımının 2025-ci ildə kəskin zəifləyib
Çinin aparıcı elektrik avtomobili istehsalçısı BYD Co. Ltd. 2025-ci ildə satış artımının son beş ilin ən zəif səviyyəsinə düşdüyünü bildirib. Şirkət il ərzində 4,6 milyon yeni enerji avtomobili təhvil verib və artım tempi cəmi 7,7% olub. Bu göstərici 2024-cü ildəki 41%-lik sıçrayışdan xeyli aşağıdır və Çində qiymət müharibələri ilə həddindən artıq istehsal fonunda formalaşıb. Bununla belə BYD 2,3 milyon tam elektrikli avtomobil sataraq ilk dəfə olaraq Tesla-nın təxminən 1,6 milyon ədədlik tam elektrikli avtomobil satışını geridə qoymağa yaxındır.
2025-ci ildə BYD-in ümumi satışları 2024-cü ildəki 4,3 milyon ədəddən artaraq şirkətin sentyabrda aşağı saldığı hədəfə uyğun gəlib. Dekabr ayında isə satışlar illik müqayisədə 18,3% azalaraq 420 398 ədədə düşüb və bu, Çin bazarında tələbin doyması səbəbilə ardıcıl dördüncü aylıq geriləmə olub. Tam elektrikli modellərin satışları 27,9% artsa da, ümumi həcmin əsas hissəsi plug-in hibridlər hesabına təmin edilib.
Tesla ilə müqayisədə ABŞ şirkətinin 2025-ci il üzrə tam elektrikli avtomobil təhvil vermələrinin 1,6 milyon ədəd ətrafında olacağı gözlənilir. Subsidiyaların azalması, istehsalın yenidən qurulması və İlon Maskın siyasi mövqeləri Tesla-nın satışlarına təzyiq göstərib. İlk doqquz ayda BYD-in tam elektrikli avtomobil satışları 1,606 milyon, Tesla-nın isə 1,218 milyon olub və BYD bu üstünlüyü 2024-cü ilin dördüncü rübündən bəri qoruyur.
Çin bazarında vəziyyəti ağırlaşdıran amillər arasında 100-dən çox yerli elektrik avtomobili brendinin rəqabəti, subsidiyaların geri çəkilməsi və zavodların həddən artıq gücü nəticəsində qiymətlərin bəzi hallarda 30%-ədək endirilməsi var. UBS Çində elektrik avtomobillərinin satış artımının 2026-cı ildə təxminən 20%-ə enəcəyini proqnozlaşdırır.
Bununla yanaşı xarici bazarlar BYD üçün müsbət istiqamət olaraq qalır. İxrac 1,05 milyon ədədə çataraq hədəfləri üstələyib və şirkət Cənub-Şərqi Asiyada, o cümlədən Tailand, Malayziya və Sinqapurda lider mövqeyə yüksəlib. BYD artıq qlobal avtomobil ixracında Yaponiya və Almaniyanı geridə qoyub və analitiklər 2026-cı ildə ümumi satışların 5,3 milyon ədədə çata biləcəyini düşünürlər.