Fed sədrindən enerji şoku fonunda açıqlama

ABŞ Federal Ehtiyat Sisteminin (Fed) sədri Jerome Powell 18 mart 2026-cı il tarixində etdiyi çıxışda artan enerji qiymətlərinə baxmayaraq stagflyasiya risklərini rədd edib və bu anlayışı “1970-ci illərə aid termin” kimi xarakterizə edib.

xarici KİV-ə istinadən xəbər verilir ki, Powell hazırkı iqtisadi vəziyyətin klassik stagflyasiya ilə uyğun gəlmədiyini bildirib. Onun sözlərinə görə indiki şəraitdə inflyasiya və işsizlik səviyyələri tarixdəki kritik dövrlərlə müqayisə oluna bilməz.

Hazırda ABŞ-da əsas inflyasiya göstəricisi olan core PCE təxminən 3%, işsizlik isə 4,4% səviyyəsindədir. Powell vurğulayıb ki, 1970-ci illərdəki kimi iki rəqəmli inflyasiya və yüksək işsizlik mövcud deyil və buna görə də “stagflyasiya” terminindən istifadə etmək düzgün deyil.

Fed sədri qeyd edib ki, iqtisadiyyatda müəyyən “gərginlik” mövcuddur. Xüsusilə özəl sektorda məşğulluq artımının zəiflədiyini desə də, vəziyyəti böhran kimi deyil, daha çox “sıfır artım balansı” kimi qiymətləndirib.

Enerji bazarındakı şoklara toxunan Powell bildirib ki, İran müharibəsi fonunda neft qiymətlərinin artması inflyasiyaya təzyiq yaradır. Brent neftinin qiyməti artıq 100 dollardan yuxarı səviyyələrə qalxıb və bu, xüsusilə yanacaq qiymətləri üzərindən iqtisadiyyata təsir edir.

Bununla belə o, bu cür enerji şoklarını əsasən müvəqqəti faktorlar kimi qiymətləndirir. Eyni zamanda xəbərdarlıq edib ki, bu cür şokların tez-tez təkrarlanması inflyasiya gözləntilərini poza bilər.

Əmək bazarı ilə bağlı Powell vəziyyəti “kövrək” adlandırıb. Fevral ayında 92 min iş yerinin itirilməsi qeydə alınsa da, ümumi mənzərənin hələlik resessiyaya işarə etmədiyini bildirib.

Pul siyasətinə gəlincə isə Fed son iclasında faiz dərəcələrini dəyişməz saxlayıb və Powell qeyd edib ki, qərarlar tələsik verilməyəcək. Onun sözlərinə görə həm inflyasiya, həm də məşğulluqla bağlı risklər “iki tərəflidir” və xüsusilə geosiyasi qeyri-müəyyənlik (o cümlədən İranla bağlı vəziyyət) qərarverməni çətinləşdirir.