Meta 80 milyard dollarlıq metaverse layihəsini dayandırır

Meta Platforms şirkəti təxminən 80 milyard dollarlıq metaverse layihəsinin uğursuzluqla nəticələnməsinə baxmayaraq səhmlərində ciddi dalğalanma müşahidə olunmayıb.

Metaverse arzusu rəsmi olaraq sona çatıb

Şirkət çərşənbə axşamı açıqlayıb ki, Quest cihazları üçün nəzərdə tutulan virtual reallıq sosial platforması Horizon Worlds mart ayının sonunda Quest mağazasından silinəcək və 15 iyun tarixindən etibarən VR platformalarından tamamilə çıxarılacaq.

Bu tarixdən sonra platforma yalnız ayrıca mobil tətbiq kimi fəaliyyət göstərəcək. Bu isə layihənin əhəmiyyətinin ciddi şəkildə azalması kimi qiymətləndirilir. Buna baxmayaraq, bazar bu xəbərə demək olar ki, reaksiya verməyib.

Gözlənilən qərar

Qərar Meta-nın metaverse istiqamətinə cavabdeh olan Reality Labs bölməsində 1.000-dən çox əməkdaşın ixtisar edilməsindən bir neçə həftə sonra açıqlanıb.

Kütləvi ixtisarlar və ardınca məhsulun bağlanması şirkətin bu layihədən mərhələli şəkildə imtina etdiyini göstərir. Horizon Worlds pik dövründə cəmi bir neçə yüz min aylıq aktiv istifadəçi cəlb edə bilib. Bu isə layihəyə qoyulan milyardlarla dollar və böyük gözləntilərlə müqayisədə olduqca aşağı göstərici hesab olunur.

80 milyard dollarlıq zərər

Reality Labs bölməsi 2020-ci ildən bu yana təxminən 80 milyard dollar zərər açıqlayıb. Təkcə son rübdə əməliyyat zərəri 6 milyard dollardan çox olub.

Müqayisə üçün qeyd edək ki, bu məbləğ orta ölçülü bir ölkənin ümumi daxili məhsuluna bərabərdir və istifadəçilərin geniş maraq göstərmədiyi virtual ekosistemin qurulmasına sərf olunub.

2021-ci ilin oktyabrında şirkətin rəhbəri Mark Zuckerberg Facebook-un adını Meta olaraq dəyişərək metaverse-i insan əlaqələrinin “növbəti mərhələsi” kimi təqdim etmişdi. O, on il ərzində bu platformanın bir milyard istifadəçiyə çatacağını proqnozlaşdırmışdı, lakin bu gözləntilər özünü doğrultmayıb.