Nvidia səhmləri 10 günlük yüksəliş seriyası göstərir

Süni intellekt (Sİ) çipləri bazarında lider şirkətlərdən biri olan Nvidia səhmləri aprel ayında güclü yüksəliş nümayiş etdirərək investorların diqqət mərkəzinə qayıdıb.

Nvidia səhmləri aprel ayında 19% artıb və ardıcıl 10 ticarət sessiyası üzrə yüksəliş seriyası nümayiş etdirib. Artım əsasən şirkətə dair müsbət xəbərlər axını və bazarlarda risk iştahının bərpası ilə əlaqələndirilir.

Şirkət bu həftə “Ising” adlı açıq kvant Sİ modelləri ailəsini təqdim edib. Bu texnologiyanın artıq EeroQ, Conductor, IQM laboratoriyaları və bir sıra aparıcı universitetlərdə istifadə olunduğu bildirilir.

Bazarların ümumi dinamizmi də artıma dəstək verib. ABŞ və İran arasında münaqişənin yumşalacağı ilə bağlı gözləntilər S&P 500 indeksinin son 10 sessiyada 9,8% yüksəlməsinə səbəb olub.

S&P 500 indeksindəki bu yüksəliş investorların yenidən yüksək riskli aktivlərə, xüsusilə də Sİ və yarımkeçirici sektoruna yönəlməsi ilə nəticələnib.

Nvidia üçün bu tendensiya xüsusilə müsbət təsir yaradıb. Wedbush analitiki Dan Ives bildirib ki, investorlar hazırda proqram təminatı sektorundan çıxaraq daha çox çip və aparat təminatı səhmlərinə yönəlir.

Bununla belə şirkətin birinci rüb performansı zəif olub və səhmlər həmin dövrdə 7,6% ucuzlaşaraq bazarı zəif nəticə ilə başa vurub. Səhm hətta 200 günlük orta qiymət səviyyəsindən aşağı düşüb.

Buna baxmayaraq ilin əvvəlində keçirilən GTC 2026 tədbirində icraçı direktor Jensen Huang 2027-ci ilə qədər 1 trilyon dollarlıq gəlir potensialı ilə bağlı proqnoz təqdim etmişdi. Lakin investorlar bu açıqlamanı artıq qiymətə daxil edilmiş gözləntilər kimi qiymətləndirərək “sell the news” reaksiyası vermişdi.

Analitiklər hazırda diqqəti “Blackwell Ultra” çip tədarüklərinin gəlirə real təsirinə və süni intellekt “inference” mərhələsində monetizasiya imkanlarına yönəldib. Eyni zamanda son strateji addımlar da investorlar tərəfindən qiymətləndirilir.

Hazırkı mərhələdə isə bazar əhval-ruhiyyəsi müsbət olaraq qalır və Nvidia səhmləri yenidən güclü artım trendinə daxil olub.