ABŞ İrana qarşı ən böyük maliyyə sanksiyalarını hazırlayır

ABŞ maliyyə naziri Skott Bessent İrana qarşı indiyədək ən böyük maliyyə sanksiyaları paketinin hazırlandığını açıqlayıb. “İqtisadi D günü” adlandırılan bu yeni tədbirlər Tehranla ticarət aparan üçüncü ölkələri də hədəfə ala bilər. Mövcud sanksiya rejimi bankçılıq, enerji, aviasiya və kriptovalyuta sektorlarını əhatə edir. Yeni tədbirlərin isə bu çərçivəni daha da sərtləşdirəcəyi gözlənilir.

Bessent İranla ticari əlaqələri davam etdirən ölkələrə sərt xəbərdarlıq edib. O bildirib: “Çökməkdə olan bir rejimin maliyyə arteriyası kimi çıxış edən hər bir ölkə onun təcridini bölüşəcəyini gözləməlidir”. Nazir ikinci dərəcəli sanksiyaların genişləndirilməsi ehtimalına işarə edib. Onun açıqlaması Yaxın Şərqdə toqquşmaların davam etdiyi və müharibənin altıncı ayına girdiyi bir dövrə təsadüf edib.

İran isə artan iqtisadi təzyiqə qarşı Hürmüz boğazında cavab tədbiri qərarı qəbul edib. Fars körfəzi Boğaz İdarəsi keçid qaydalarını pozan gəmilərə cərimə tətbiq olunacağını, gəmilərin saxlanıla və ya müsadirə edilə biləcəyini açıqlayıb. Bundan başqa, İran parlamenti boğazdan keçən gəmilərdən xidmət haqqı alınmasını nəzərdə tutan qanun layihəsini komissiyadan keçirib.

İran Ali Milli Təhlükəsizlik Şurasının baş katibi Möhsün Rızai ABŞ sanksiyalarına dəstək verən qonşu ölkələri hədələyib. O, “Bizə qarşı iqtisadi məhdudiyyətlərə ortaq olan hər bir ölkə tərəfimizdən düşmən kimi qiymətləndiriləcək” deyib. İranın xarici işlər naziri Abbas Əraqçi isə Vaşinqtonun bu addımını “çarəsiz bir addım” adlandırıb və iqtisadi təzyiq siyasətinin uğursuz olacağını bildirib.

Hərbi və iqtisadi gərginliyə baxmayaraq, Asiya bazarlarında neft qiymətləri günə enişlə başlayıb. ABŞ tipli xam neft (WTI) yüzde 1,56 azalaraq 85,70 dollara, Brent nefti isə yüzde 1,3 geriləyərək 93,16 dollara düşüb. Böyük Britaniya Dəniz Ticarəti Əməliyyatları (UKMTO) son 48 saatda boğazda təsdiqlənmiş hücum olmadığını, lakin mina riskinin davam etdiyini bildirib.