Pezeşkian: İran ABŞ-la dialoqa hazırdır

İran ABŞ-la dialoqa hazırdır, lakin əsas maraqları üzrə kompromisə getməyəcək. Bunu İran Prezidenti Məsud Pezeşkian deyib.

Pezeşkian müsahibəsində vurğulayıb ki, iki ölkə arasında fikir ayrılıqlarının həlli danışıqlar və qarşılıqlı anlaşma yolu ilə mümkündür. Bununla belə, Tehran iqtisadi təzyiqlərə müqavimət göstərməkdə qərarlıdır və milli maraqlarını müdafiə edərkən geri çəkilməyəcək.

O, həmçinin qeyd edib ki, İran hökuməti ABŞ-ın tətbiq etdiyi sanksiyaların təsirini azaltmaq üçün xüsusi fəaliyyət planı hazırlayıb. Pezeşkian bildirib ki, Vaşinqtonun İranı geri çəkilməyə məcbur etmək cəhdləri nəticə verməyəcək.

Tehranla Vaşinqton arasında münasibətlər onilliklərdir gərgin olaraq qalır. Bunun əsas səbəbləri İranın nüvə proqramı, regional təsiri və geniş iqtisadi sanksiyaların tətbiqi ilə bağlı mübahisələrdir.

Davam edən diplomatik gərginliklərə baxmayaraq, hər iki tərəf bəzən danışıqlara hazır olduğunu göstərib. Eyni zamanda, tərəflər strateji mövqelərini sərt şəkildə qorumaqda davam edir.