ABŞ TotalEnergies-ə külək layihələrindən imtina üçün 1 milyard dollar ödəyəcək

Tramp administrasiyası Fransanın enerji nəhəngi TotalEnergies-ə ABŞ-da planlaşdırılan külək enerjisi layihələrindən imtina etməsi üçün təxminən 1 milyard dollar ödəyəcək.

Razılaşmaya əsasən şirkət Nyu-York və Şimali Karolina sahillərində yerləşən iki iri dəniz külək layihəsindən imtina edir. Söhbət ümumi gücü 4,2 GVt olan Attentive Energy və Carolina Long Bay layihələrindən gedir.

Qeyd edək ki, bu layihələr 2022-ci ildə təxminən 955 milyon dollara alınmışdı.

ABŞ Ədliyyə Nazirliyi tərəfindən TotalEnergies-ə 928 milyon dollar ödəniləcək. Şirkət isə bu vəsaiti ABŞ-da LNG layihələrinə, Meksika körfəzində neft hasilatına və data mərkəzləri üçün qaz əsaslı enerji istehsalına yönəltməyi öhdəsinə götürüb.

Şirkətin baş direktoru Patrick Pouyanné bu addımı “pragmatik qərar” adlandırıb və mövcud siyasət şəraitində subsidiyasız külək enerjisinin iqtisadi cəhətdən səmərəli olmadığını bildirib.

Bu qərar ABŞ-da enerji siyasətinin dəyişdiyini göstərir. Administrasiya bərpa olunan enerji layihələrindən daha çox neft və qaz sektoruna üstünlük verməyə başlayıb.

Razılaşma həmçinin digər külək layihələri üzrə mümkün məhkəmə çəkişmələrinin qarşısını almaq məqsədi daşıyır.