Morgan Stanley neft üçün yüksək qiymət proqnozunu saxlayır

Morgan Stanley uzunmüddətli neft proqnozlarını ümumilikdə sabit saxlayıb, lakin Hörmüz boğazı və Fars körfəzi enerji infrastrukturuna son zərbədən sonra təklifin yalnız yavaş bərpa olunacağını bildirib.

Bankın martın 23-də yayımladığı yeniləməyə görə Brent markalı neftin qiyməti 2026-cı ilin ikinci rübündə orta hesabla təxminən 110 dollar təşkil edə bilər. Proqnoza əsasən, qiymətlərin üçüncü rübdə 90 dollar, ilin sonuna isə 80 dollar səviyyəsinə enəcəyi gözlənilir. Bank vurğulayıb ki, boğazın yenidən açılması zədələnmiş tədarük zəncirlərinin dərhal bərpası demək deyil.

Bu yanaşma Morgan Stanley-in əvvəllər 2026-cı il üçün Brent neftinin qiymətini təxminən 60 dollar səviyyəsində proqnozlaşdırması ilə müqayisədə daha optimist hesab olunur. Geosiyasi risklərin artması fonunda proqnozlar qısa müddətdə ciddi şəkildə yüksəldilib.

Bank hesab edir ki, bazar “dərin boşluq” təsiri ilə üzləşib və dayandırılmış obyektlərin yenidən işə salınması, zədələrin aradan qaldırılması və Fars körfəzində qalan tanker yükünün daşınması vaxt tələb edəcək. Hətta atəşkəs və ya boğazın açılmasından sonra belə, daşınma bottleneck-ləri, saxlama məhdudiyyətləri və zədələnmiş infrastruktur səbəbindən risk mükafatlarının aylarla yüksək qalacağı gözlənilir.

Sektor üzrə qiymətləndirmələrə görə, neft və qaz bazarının normallaşması aylar çəkə bilər. Mayeləşdirilmiş təbii qaz (LNG) ixrac zavodlarının yenidən işə düşməsi daha uzun vaxt tələb etdiyindən qaz bazarında bərpanın neftlə müqayisədə daha ləng olacağı bildirilir.

Morgan Stanley-in fikrincə təklifin sürətlə bərpa olunmaması müharibə ilə bağlı fasilələrin təsirini kompensasiya etməyə imkan verməyəcək. Bu isə bəzi tədarüklər bərpa olunsa belə, neft qiymətlərinin böhran öncəsi səviyyələrdən yuxarı qalmasına səbəb ola bilər.

Bahalı neft enerji sektorunun səhmlərini dəstəkləyir və inflyasiyaya həssas aktivlər üzərində təzyiqi artırır, çünki yüksək enerji qiymətləri nəqliyyat, istehsal və istehlak qiymətlərinə birbaşa təsir göstərir.