OPEC+ İran zərbələrindən sonra neft hasilatını gözləniləndən daha çox artıra bilər

OPEC+ nümayəndələrinin bildirdiyinə görə bazar günü keçiriləcək iclasda qrup planlaşdırılandan daha böyük həcmdə neft hasilatı artımını müzakirə edəcək. Qərar ABŞ və İsrail tərəfindən İrana endirilən hava zərbələrindən sonra gündəmə gəlib. Hücumlar xam neft qiymətlərini yüksəldib və tədarükün pozulması risklərini artırıb.

Əvvəlki plana əsasən, alyansın əsas səkkiz üzvü (Səudiyyə Ərəbistanı, Rusiya, Birləşmiş Ərəb Əmirlikləri, Qazaxıstan, Küveyt, İraq, Əlcəzair və Oman) aprel ayı üçün gündəlik 137 min barel həcmində nisbətən təvazökar artımı təsdiqləməli idi. Bu qərar daha əvvəl üç aylıq fasilədən sonra mərhələli artımların bərpasını nəzərdə tuturdu. Məqsəd yay mövsümündə, xüsusilə ABŞ-da avtomobil səfərlərinin artdığı dövrdə yüksələn tələbatı qarşılamaq və ABŞ şist istehsalçıları kimi qeyri-OPEC ölkələrindən bazar payını geri almaq idi.

Geosiyasi risklərin artması planı dəyişə bilər. Səudiyyə Ərəbistanı və Birləşmiş Ərəb Əmirlikləri mümkün İran ixrac fasilələrini və ya Hörmüz boğazında riskləri nəzərə alaraq artıq ixracı artırıblar. Bu isə onların bazarda mümkün boşluğu doldurmağa hazır olduqlarını göstərir.

Zərbə xəbərləri fonunda Brent markalı neftin qiyməti bir barel üçün 73 dollara yüksələrək iyuldan bəri ən yüksək səviyyəyə çatıb. Əgər təchizat fasilələri məhdud qalarsa, daha böyük hasilat artımı qiymətləri sabitləşdirə bilər. Bununla belə OPEC+ tarixən geosiyasi hadisələrə ehtiyatla yanaşıb və real təchizat itkisini qiymətləndirmədən kəskin addımlar atmamağa üstünlük verib.

Analitiklər hesab edirlər ki, neft infrastrukturuna birbaşa zərbə riski hələlik məhduddur. Lakin Hörmüz boğazının bağlanması və ya iri yataqlara hücum ssenarisi reallaşarsa, Brent qiymətləri 100 dolları aşa bilər ki, bu da OPEC+ üzvlərini hasilatı daha sürətlə artırmağa məcbur edə bilər. Bazar günü saat 11:00 GMT-də (Bakı vaxtı ilə 15:00-da) keçiriləcək virtual iclas alyansın mövqeyində mümkün dönüş nöqtəsi kimi qiymətləndirilir.