ABŞ borcu 40 trilyon dolları keçdi

ABŞ dövlət borcunun 40 trilyon dolları aşması maliyyə dünyasında davamlılıq müzakirələrini yenidən gündəmə gətirib. Richmond Fed-in prezidenti Tom Barkin bildirib ki, borclanma indiki sürətlə davam edərsə, “hesablaşma” qaçılmaz olacaq. Lakin o, bunun nə vaxt baş verəcəyini proqnozlaşdırmağın mümkün olmadığını deyib.

Barkin vurğulayıb ki, hökumət investorlardan borc almağa davam etdiyi müddətdə borclanma sürdürüilə bilər. Bununla belə, tələbin müəyyən mərhələdə zəifləməsi riski var. ABŞ-nin qlobal ehtiyat valyuta statusu və hüquq sistemi investor tələbini dəstəkləyir. Barkin “Bir nöqtədə insanlar borcunuzu almağı dayandırır və risk də buradadır” deyib.

Pul siyasəti ilə bağlı qiymətləndirmə aparan Barkin Fed-in iyul iclasındakı faiz qərarını “çətin qərar” kimi xarakterizə edib. Fed siyasət faizini ardıcıl beşinci iclasda sabit saxlayıb. Üç rəsmi isə 25 baza bəndlik artım lehinə əks səs verib. Barkin faizlərin iqtisadiyyat üzərindəki təzyiqini ölçməyin çətin olduğunu qeyd edib.

İnflyasiyadakı geriləmənin faizlərin hələlik sabit saxlanmasını dəstəklədiyini bildirən Barkin deyib ki, qiymət təzyiqləri davamlı xarakter alarsa, Fed yenidən faiz artırmalı ola bilər. O, Fed-in 15-16 sentyabr tarixlərində keçiriləcək iclasına qədər iki aylıq əlavə iqtisadi məlumat əldə edəcəyinə diqqət çəkib. Barkin “İndiyə qədər bir tam məlumat toplusu gördük, daha birini alacağıq və nə öyrəndiyimizə baxacağıq” deyib.

Richmond Fed-in prezidenti həmçinin ABŞ ilə Kanada arasındakı ticarət gərginliyinin tariflərin qiymətlər və iqtisadiyyat üzərindəki təsiri ilə bağlı qeyri-müəyyənliyi artırdığını bildirib. O, Kanada ilə bağlı son hadisəni ABŞ-nin ticarət siyasətində böyük dəyişiklik kimi görmədiyini deyib. Bununla belə, yekun tarif dərəcələrinin harada formalaşacağının hələ də qeyri-müəyyən olduğunu ifadə edib.