Aİ vahid bazar üçün yeni son tarixləri açıqlayıb

Avropa İttifaqı liderləri 19-20 mart 2026-cı il tarixlərində keçirilən Avropa Şurası sammitində qlobal qeyri-sabitlik fonunda vahid bazarın gücləndirilməsi üçün konkret tədbirlər və son tarixləri müəyyən ediblər.

Sammit çərçivəsində qəbul edilən qərarlara əsasən, vahid şirkət rejimi (EU Inc) 2026-cı ilin sonuna qədər təsdiqlənməlidir.

Eyni müddət ərzində sərmayə və qənaət birliyi üzrə əsas qanunvericilik sənədlərinin qəbul edilməsi planlaşdırılır.

Bundan əlavə “28-ci rejim”, sadələşdirmə paketləri, sənaye sürətləndirici təşəbbüslər, enerji və şəbəkə paketləri, eləcə də rəqəmsal avro ilə bağlı layihələrin də 2026-cı ilin sonuna qədər tamamlanması nəzərdə tutulur.

Avropa İttifaqında tam iqtisadi inteqrasiyanın isə 2027-ci ilin sonuna qədər həyata keçirilməsi hədəflənir.

Qərarlar Mario Draghi və Enrico Letta tərəfindən hazırlanmış hesabatlara əsaslanır. Bu hesabatlarda qeyd olunur ki, vahid bazarın tam inteqrasiyası Avropa iqtisadiyyatına illik 650 milyard avro əlavə dəyər qazandıra bilər.

Hörmüz boğazında gərginlik, Rusiya ilə bağlı müharibə və ABŞ siyasətindəki dəyişikliklər fonunda bu addımların əhəmiyyəti daha da artıb.

Avropa Sənaye Dairəvi Masası (ERT) kimi biznes qurumları da 2028-ci ilə qədər vahid bazarın tam tamamlanmasına çağırış edib.

Sammitdə enerji bazarlarının sabitləşdirilməsi məqsədilə istehsalçı ölkələrlə əməkdaşlığın gücləndirilməsi razılaşdırılıb.

Eyni zamanda karbon emissiyaları ticarət sistemi (ETS) üzrə “kiçik tənzimləmələrin” 2026-cı ilin yayına qədər həyata keçirilməsi planlaşdırılır.