Bazarlarda narahatlıq artır: İnvestorlar rallinin sonuna yaxınlaşıldığını düşünür

Nvidia-nın ötən həftə açıqladığı güclü maliyyə nəticələrinə baxmayaraq, bazarda dəyərələmə risklərinə dair tərəddüd davam edir.

Opsion investorları ABŞ fond bazarlarında ilin əvvəlindən bəri davam edən yüksəlişin sona çata biləcəyindən ehtiyatlanırlar.

Bitcoin-in rekorddan sonra dəyərinin təxminən üçdə birini itirməsi və Federal Ehtiyat Sisteminin faiz endirimlərinə dair qeyri-müəyyənliyin artması fonunda S&P 500-də volatillik yenidən yüksəlib. Keçən həftə indeksdə gün içi maksimum-minimum fərqi iyun ayından bəri ən yüksək səviyyəyə çatıb. Nvidia-nın nəticələri elan etdiyi gün isə indeks 8 apreldən bəri ən böyük zirvə-dip hərəkətini göstərib və Cboe Volatillik İndeksi (VIX) aprel ayından bəri ən yüksək səviyyədə bağlanıb.

Texnoloji şirkətləri izləyən Invesco QQQ Trust Series 1 fondunun opsionlarının dəyəri də artaraq SPDR S&P 500 opsionlarına nisbətdə 2024-cü ilin avqustundan bəri ən yüksək səviyyələrə yaxınlaşıb. Bu isə texnologiya sektoru ilə bağlı risklərin yüksəldiyini və investorların qoruyucu opsionlar üçün daha yüksək məbləğ ödəməyə hazır olduğunu göstərir.

Son altı aylıq VIX səviyyəsinin, eyni dövrdə S&P 500-də müşahidə edilən faktiki oynaqılıqla müqayisədə tarixən nadir rast gəlinən premiumla ticarət edilməsi, bazarın növbəti 6 ayda daha çox volatillik gözlədiyini göstərir. Hedge fonu Oraclum Capital-in baş investisiya direktoru Vuk Vukoviç ilin sonuna qədər volatilliyin yenidən artacağını proqnozlaşdırsa da, bayram mövsümündən əvvəl bir qədər yumşalma gözləyir.

Bu arada S&P 500 martdan bəri ən zəif aylıq performansını göstərməyə hazırlaşır. Bu isə tarixən noyabr aylarının əksər hallarda yüksəlişlə başa çatdığı nəzərə alınarsa, nadir rast gəlinən bir vəziyyətdir.

İl sonu rallisi üçün ümid yaradan proqnozlar

Bəzi analitiklər isə mövcud enişi ilin sonuna doğru mümkün bir yüksəlişin xəbərçisi kimi qiymətləndirirlər. Navellier & Associates-in baş strategı Lui Navellier bildirir:
“Düzəlişin dəqiq dibi bəlli deyil, amma dekabrda Fed-in faiz endirimləri ilə bağlı daha müsbət proqnozlar formalaşsa, bazarlarda güclü bir bərpa görə bilərik.”