Dünya Bankı Çin üzrə 2026-cı il artım proqnozunu yüksəldib

Dünya Bankı Çin iqtisadiyyatının 2026-cı ildə artım proqnozunu 4,2 faizdən 4,4 faizə yüksəldib. Bank yüksək texnologiya investisiyaları və ixracın artıma müsbət töhfə verdiyini bildirib. Bununla yanaşı, zəif daxili tələb və daşınmaz əmlak sektorundakı durğunluğun artım üzərində təzyiqinin davam etdiyi vurğulanıb.

Yayımlanan Çin İqtisadi Yeniləməsi hesabatında ilin ilk aylarında güclü yüksək texnologiya investisiyaları və ixrac sayəsində iqtisadiyyatın dayanıqlığını qoruduğu qeyd olunub. Siyasət dəstəklərinin, qlobal enerji təchizatındakı fasilələrə qarşı yaradılan ehtiyatların və yüksək texnologiya investisiyalarının ikinci rübdə zəifləyən daxili tələbi qismən kompensasiya etdiyi bildirilib.

Bank daşınmaz əmlak sektorunda zəifləyən mənzil tələbinə uyğunlaşma prosesinin davam etməsi və istehlakçıların ehtiyatlı davranması səbəbindən 2026-cı ildə artımın 4,4 faizə enəcəyinin gözlənildiyini açıqlayıb. İqtisadiyyatın istehlaka əsaslanan struktura yenidən tarazlaşdırılmasında irəliləyişin mərhələli olacağına görə 2027-ci ildə artımın 4,3 faizə düşəcəyi proqnozlaşdırılır.

Hesabatda iqtisadi mənzərə ilə bağlı risklərin ümumilikdə balanslı olduğu qeyd edilib. Qlobal enerji təchizatına dair qeyri-müəyyənliklərin azalmasına baxmayaraq, neft qiymətlərində dalğalanma riskinin qaldığı bildirilib. Daşınmaz əmlak sektorundakı geriləmə dərinləşərsə, bunun istehlak xərcləri və sektordakı investisiyalar üzərində təzyiqi artıra biləcəyi barədə xəbərdarlıq edilib.

Hesabatda həmçinin maliyyə stimullarının və Sİ qaynaqlı investisiyaların gözləniləndən güclü reallaşacağı halda artımın mövcud proqnozları üstələyə biləcəyi qeyd olunub.