Fed-in keçmiş qubernatoru Adriana Kuglerin istefasının arxasında etik qalmaqal ortaya çıxdı
ABŞ Federal Ehtiyat Sisteminin (Fed) keçmiş qubernatoru Adriana Kugler qəfil istefa verdikdən sonra onun gedişinin arxasında etik qaydaların pozulması ilə bağlı yaranmış problemlər və bununla əlaqədar sədrlikdən aldığı rədd cavabı dayanmışdı. Məsələ ilə bağlı məlumatı şənbə günü açıqlanan sənədlərə istinad edən Fed rəsmisi bildirib.
Sənədlərə görə, Kugler istefadan əvvəl təqdim etdiyi maliyyə açıqlamalarında aşkar olunan fəaliyyətə görə həm daxili nəzarət orqanının araşdırmasına cəlb olunmuşdu, həm də Fed-in etik xidməti onun son açıqlamalarını sertifikatlaşdırmaqdan imtina edərək məsələnin Mərkəzi Bankın Baş Müfəttişinə göndərildiyini qeyd etmişdi. Həmin açıqlamalarda Fed-in daxili etik tələblərinə zidd görünən maliyyə əməliyyatları üzə çıxmışdı.
Kugler avqustun 1-də, iyulun 29–30-da keçirilmiş iclasda iştirak etmədikdən sonra, səbəb göstərmədən, vəzifəsini avqustun 8-dən etibarən tərk edəcəyini açıqlamışdı. O zaman Fed onun iclasa qatılmamasını “şəxsi məsələ” ilə izah etmişdi.
Fed rəsmisinin verdiyi məlumata görə, Kugler həmin iclasdan əvvəl icazə verilməyən maliyyə aktivlərini tənzimləmək məqsədilə müəyyən maliyyə əməliyyatları aparmaq üçün istisna xahişi irəli sürmüş, bunu sədr Cerom Pauellə müzakirə etmişdi. Pauell isə bu tələbi qəbul etməmişdi. Kugler məsələ ilə bağlı şərh verməkdən imtina edib.
Şənbə günü yayımlanan maliyyə açıqlamasında Fed-in etik rəsmisi Şon Krostın bildirmişdi ki, “standart praktika və siyasətlərimizə uyğun olaraq, bu açıqlama ilə bağlı məsələlər ilin əvvəlində Fed İdarə Heyətinin Müstəqil Baş Müfəttiş Ofisinə yönləndirilmişdi.” Sənədlər Kugler-in 2024 və 2025-ci illər üzrə, istefasına qədər olan dövrü əhatə etdiyini göstərib. Qeyd olunub ki, yüksək vəzifəli Fed rəsmiləri hər il və vəzifədən ayrıldıqdan sonra maliyyə açıqlamaları təqdim etməli, həmçinin dövri maliyyə əməliyyatları barədə ayrıca hesabat verməlidirlər.
2024-cü il ərzində təqdim olunan dövri açıqlamalarda Kugler həyat yoldaşının Apple Inc. və Cava Group Inc. şirkətlərinin səhmlərini alması nəticəsində Fed-in investisiya və ticarət qaydalarının pozulduğunu etiraf etmişdi. Bu əməliyyatlar Fed-in yüksək vəzifəli şəxslər, onların həyat yoldaşları və azyaşlı övladları üçün fərdi səhmlərin alınmasını qadağan edən qaydalarına zidd idi. Kugler həmin alışların həyat yoldaşının onun xəbəri olmadan həyata keçirdiyini bildirmiş, səhmlərin sonradan satıldığını və Fed-in etik rəsmisinin onu qanunvericiliyə uyğun hesab etdiyini vurğulamışdı.
Kugler-in istefası prezident Donald Trampa gözləniləndən daha tez Fed İdarə Heyətində vakant yer doldurmaq imkanı yaratmışdı. Bu yer daha sonra administrasiyanın iqtisadi müşaviri və ardıcıl şəkildə sürətli faiz endirimlərini müdafiə edən Stiven Mirana verilmişdi.