Hindistan Rusiyadan neft alışında dollardan imtina edir

Hindistan Rusiyadan neft idxalında ABŞ dollarından asılılığı azaltmaq üçün alternativ valyutalara keçidi sürətləndirir.

Hindistan artıq neft ticarətində Çin yuanı, Hindistan rupisi və BƏƏ dirhəmi kimi valyutalardan aktiv istifadə edir. Məlumatlara görə, son dövrdə Rusiyadan idxal edilən neftin təxminən 10%-i yuanla ödənilib.

Indian Oil Corporation son 2-3 neft partiyasının ödənişini yuanla həyata keçirib. Özəl neft emalı şirkətləri isə bu praktikadan daha geniş istifadə etməyə davam edir.

Rupi və dirhəm əsas ödəniş vasitələri olaraq qalır. Lakin Rusiyanın böyük həcmdə rupi toplaması səbəbindən bəzi əməliyyatlarda dirhəmə keçid müşahidə olunur.

Eyni zamanda tərəflər kriptovalyutalardan da istifadə imkanlarını sınaqdan keçirir. Kiçik həcmli əməliyyatlarda yuan və ya rupi ofşor hesablara köçürülərək Bitcoin və Tether kimi rəqəmsal aktivlərə çevrilir, daha sonra isə rubla konvertasiya edilir.

Bu yanaşmanın əsas səbəbi Qərb sanksiyaları fonunda dollarla əməliyyatların məhdudlaşmasıdır. Rusiya xüsusilə Çinlə ticarətdə yuanı üstün tutur, bu da əməliyyatların daha rahat həyata keçirilməsinə imkan verir.

Xatırladaq ki, Hindistan Rusiyadan neft idxalında dünyanın ən böyük alıcılarından biridir və 2025-ci ildə bu idxalın dəyəri 192 milyard dollar təşkil edib.