İran müharibəsi ABŞ-da inflyasiya riskini artırır

İranla bağlı müharibə Donald Tramp administrasiyasının inflyasiyanı aşağı salmaq və yaşayış xərclərini azaltmaq planlarını risk altına sala bilər.

Analitiklərə görə Yaxın Şərqdə gərginliyin artması enerji qiymətlərini sürətlə yüksəldərək ABŞ-da inflyasiya təzyiqlərini yenidən gücləndirə bilər. Hazırda ölkədə benzin qiymətləri orta hesabla 3,32 dollar/qallon səviyyəsinə çatıb ki, bu da 2024-cü ilin sentyabrından bəri ən yüksək göstəricidir.

Enerji bazarlarında bahalaşma əsasən Hörmüz ətrafında yaranan risklərlə əlaqələndirilir. Neftin qiyməti hazırda təxminən 92-93 dollar/barel səviyyəsindədir. İqtisadçılar hesab edir ki, bu qiymətlər uzun müddət qalarsa, ABŞ-da istehlak qiymətləri indeksinə təxminən 0,5 faiz bəndi əlavə təzyiq yarada bilər.

Mövcud vəziyyət Federal Reserve üçün də çətin seçim yaradır. Bir tərəfdən fevral ayında ABŞ-da 92 min iş yerinin azalması və işsizlik göstəricilərinin yüksəlməsi faiz endirimlərini əsaslandıra bilər. Digər tərəfdən isə enerji qiymətlərinin artması inflyasiya riskini gücləndirərək faiz endirimlərini gecikdirə bilər.

Bəzi ekspertlər hesab edir ki, inflyasiya 2% hədəfinə yaxınlaşana qədər ABŞ Mərkəzi Bankı faizləri sabit saxlaya bilər.

Prezident Tramp isə münaqişənin enerji bazarına təsirini azaltmağa çalışaraq bildirib ki, “müharibə başa çatdıqdan sonra yanacaq qiymətləri sürətlə aşağı düşəcək”. Bununla yanaşı administrasiya neft tankerlərinin təhlükəsiz daşınmasını təmin etmək üçün Hörmüz boğazında sığorta və hərbi müşayiət proqramları da elan edib.