Türkiyə COP31-ə ev sahibliyi edəcək
Türkiyə gələn il Antalya şəhərində keçiriləcək COP31 sammitinə ev sahibliyi edəcək və bununla da BMT-nin ən böyük iqlim toplantısının məkanı ilə bağlı Türkiyə və Avstraliya arasındakı uzun sürən anlaşılmazlığa son qoyacaq.
Avstraliyanın Baş naziri Entoni Albanese cümə axşamı açıqlayıb ki, onlar Türkiyə ilə razılığa gəlib. Razılaşmaya əsasən Avstraliya 2026-cı il iqlim sammitinə gedən danışıqlara Sakit okean ölkələri ilə birlikdə rəhbərlik edəcək, rəsmi toplantının prezidentliyi isə Türkiyəyə keçəcək.
Albanese ABC Radio Perth-ə açıqlamasında qeyd edib: “Hazırladığımız razılaşma həm Avstraliya, həm də Türkiyə üçün böyük uğurdur.”
Açıqlama bu il Braziliyanın Belém şəhərində keçirilən COP30 sammitinin cümə günü başa çatmasına az qalmış verilib.
Avstraliya COP31-ə ev sahibliyi etmək və onu Sakit okean adaları ilə birlikdə “Sakit okean COP” konfransı kimi təşkil etmək istəyirdi. Bu ölkələrin əksəriyyəti dəniz səviyyəsinin qalxması və iqlimlə bağlı fəlakətlər qarşısında daha çox risk altındadır.
Lakin Türkiyə sammiti keçirmək iddiasından geri çəkilmədi. Türkiyə bildirmişdi ki, inkişaf etməkdə olan bir ölkə kimi bu sammitdə zəngin və kasıb ölkələr arasında həmrəyliyi təşviq etməyi nəzərdə tutur və toplantı daha qlobal, regional olmayan bir çərçivə daşıyacaq.
İndi Türkiyənin sadəcə 12 ay vaxtı var. Bunun səbəbi ev sahibliyinin təsdiqlənməsi prosesinin uzanması və eyni anda iki ölkənin ev sahibliyinə iddia etdiyi hallarda tətbiq olunacaq prosedurların mövcud olmamasıdır.
BMT-nin İqlim Dəyişikliyi üzrə Çərçivə Konvensiyasına əsasən COP prezidentliyi 5 bölgə arasında dövri şəkildə dəyişir: Afrika, Asiya, Latın Amerikası və Karib hövzəsi, Mərkəzi və Şərqi Avropa, Qərbi Avropa və digərləri.
Avstraliya və Türkiyə son kateqoriyaya daxildir. Bu o deməkdir ki, Avstraliya sammitə ev sahibliyi etmək üçün yenidən müraciət etməzdən əvvəl daha beş il gözləməli olacaq.
Efiopiyanın Planlama və İnkişaf naziri Fitsum Assefa Adela ötən həftə açıqlamışdı ki, ölkəsi artıq 2027-ci ildəki COP32-yə ev sahibliyi etmək üçün Afrika ölkələrinin dəstəyini alıb.