Trampın kripto gəlirləri 1 milyarddan çoxdur

ABŞ İctimai Etika İdarəsi tərəfindən yayımlanan illik maliyyə bəyannaməsi hesabatına görə, ABŞ-ın keçmiş Prezidenti Donald Trump 2025-ci ildə kriptovalyuta və memecoin fəaliyyətlərindən ən azı 1,2 milyard dollar gəlir əldə edib. Hesabatda Trumpın dövlət vəzifəsindən kənar mövqeləri, idarəçilik və sədr vəzifələri, həmçinin həyat yoldaşı Melania Trumpın əmlak aktivləri də yer alıb.

Trumpın özü, oğulları və yüksək səviyyəli diplomat Steven Witkoffun təsisçiləri arasında olduğu kriptovalyuta şirkəti World Liberty Financialın satışlarından 588 milyon dollardan çox gəlir əldə etdiyi bildirilib. Şirkətin CEO-su kimi ABŞ-ın Yaxın Şərq üzrə xüsusi nümayəndəsi Steven Witkoffun oğlu Zach Witkoff fəaliyyət göstərir. Bundan başqa, Trumpın memecoin təşəbbüsü CIC Digital LLC-nin 636 milyon dollar gəlir əldə etdiyi açıqlanıb. Bu gəlirin böyük hissəsi Celebration Coins ilə bağlanan lisenziya razılaşmasından yaranan royalti gəlirlərindən ibarətdir. CIC Digital LLC-nin rəqəmsal pulqabılarında ən azı 60 milyon dollar dəyərində kriptoaktivin olduğu qeyd edilib.

Trumpın investisiya portfelində iri texnologiya şirkətlərinin səhmləri ilə yanaşı, bələdiyyə və dövlət istiqrazları, həmçinin birja investisiya fondları yer alır. İnvestisiyalardan əldə edilən dividend, kapital qazancı və faiz gəlirləri hesabatda geniş dəyər aralıqları ilə göstərilib. Bloomberg Milyarderlər İndeksinə görə, Trumpın ümumi sərvəti təxminən 7,6 milyard dollar səviyyəsindədir.

Həmçinin ABŞ vitse-prezidenti JD Vance-in də 17 səhifəlik illik maliyyə bəyannaməsi hesabatı yayımlanıb. Hesabatda Vance-in kitabından əldə etdiyi gəlirlər, təsisçisi olduğu Narya Capital və idarəedici tərəfdaşı olduğu Rise of the Rest Seed Fund-dan qazandığı gəlirlər, eləcə də dəyəri 250 min ilə 500 min dollar arasında dəyişən bitcoin aktivləri yer alıb.

ABŞ-da prezident və vitse-prezident də daxil olmaqla maliyyə açıqlaması öhdəliyi olan dövlət rəsmiləri əmlak aktivlərini mütəmadi olaraq ABŞ İctimai Etika İdarəsinə təqdim edirlər.