Azərbaycanda cinayətkarlardan ilk dəfə bitkoin müsadirə olunub

Azərbaycanda ilk dəfə cinayətkarlardan bitkoinlər müsadirə olunub. Dövlət Təhlükəsizliyi Xidməti tərəfindən saxlanılan B.H.R. və İ.R.F. barəsində məhkəmə prosesi başa çatıb. Yasamal Rayon Məhkəməsi təqsirləndirilən şəxsləri qarşılıqlı əvəzləşmələr və digər üsullardan istifadə etməklə Azərbaycandan xaricə və əks istiqamətdə xüsusilə külli miqdarda pul vəsaitinin qanunsuz köçürülməsini təşkil etdiklərinə görə Cinayət Məcəlləsinin 206-1.3-cü maddəsi ilə təqsirli bilib.

B.H.R. 3 623 568 manat cərimə olunmaqla 2 il 5 ay müddətinə azadlığın məhdudlaşdırılması cəzasına məhkum edilib. İ.R.F. isə 31 399 709 manat cərimə olunmaqla 3 il müddətinə azadlığın məhdudlaşdırılması cəzası alıb. Məhkəmə beynəlxalq kriptobirja Binance hesabında saxlanılan 830 vahid kriptovalyutanın dövlətin xeyrinə müsadirə edilməsi barədə qərar çıxarıb. Bu aktivlərin üzərinə ibtidai istintaq mərhələsində həbs qoyulub.

Azərbaycan Cinayət Məcəlləsinin 99-1-ci maddəsində nəzərdə tutulan xüsusi müsadirə cinayətin törədilməsində istifadə olunan alət və vasitələrin, həmçinin cinayət yolu ilə əldə edilmiş əmlakın əvəzsiz alınması deməkdir. “Cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” qanuna əsasən, bu anlayışa virtual aktivlər də daxildir.

Kriptovalyutanın dövlətin xeyrinə müsadirəsi təcrübəsi Azərbaycan üçün yenilikdir və mediada fəal müzakirə olunur. Bu sahə əvvəl tənzimlənməmiş qalırdı və həm respublika, həm də qlobal miqyasda çağırış hesab edilir. Hazırda Azərbaycanda virtual aktivlərin və kriptobazarın hüquqi tənzimlənməsini təmin edəcək qanun layihəsi üzərində iş aparılır.