Google Berlində Almaniyanın ilk süni intellekt mərkəzini açıb

Xarici KİV-ə istinadən portfel.az xəbər verir ki, Google Berlin şəhərində Almaniyada ilk süni intellekt mərkəzini açıb.

Şirkətin məlumatına görə yeni mərkəz 2029-cu ilə qədər Almaniyada həyata keçiriləcək 5,5 milyard avroluq investisiya proqramının bir hissəsidir. Proqram çərçivəsində yeni məlumat mərkəzlərinin tikintisi və ofislərin genişləndirilməsi də planlaşdırılır.

Mərkəz Berlinin Mitte rayonunda yerləşir və burada Google DeepMind, Google Research və Google Cloud komandaları fəaliyyət göstərəcək. Məkan süni intellekt üzrə innovasiya layihələri, texnologiya nümayişləri və startaplar, universitetlər və dövlət qurumları ilə əməkdaşlıq üçün nəzərdə tutulub.

Yeni obyekt həmçinin tədbirlər üçün xüsusi sahə, 80-dən çox qonaq üçün konfrans otaqları və “AI Forum” adlı müzakirə platformasını da əhatə edir.

Layihə çərçivəsində Google Almaniyada texnologiya infrastrukturu və bulud xidmətlərini də genişləndirəcək. Buraya Dietzenbach şəhərində yeni məlumat mərkəzinin tikintisi, Hanau mərkəzinin genişləndirilməsi və Berlin, Münhen və Frankfurt ofislərinin inkişafı daxildir.

Almaniyanın rəqəmsallaşma naziri Karsten Wildberger layihəni “Almaniya üçün yüksək texnologiya və innovasiya baxımından mühüm addım” kimi qiymətləndirib.

Araşdırmalara görə generativ süni intellekt texnologiyaları 2034-cü ilə qədər Almaniya iqtisadiyyatına təxminən 440 milyard avro əlavə dəyər gətirə bilər.