OpenAI 730 milyard dollar dəyərləmə ilə 110 milyard dollarlıq yeni investisiya cəlb edib

OpenAI süni intellekt sahəsində artan qlobal tələbat fonunda 730 milyard dollar dəyərləmə əsasında ümumilikdə 110 milyard dollarlıq yeni maliyyə raundunu tamamladığını açıqlayıb. İnvestisiya turunda SoftBank, Nvidia və Amazon iştirak edib.

Şirkətin yaydığı bəyanatda bildirilib ki, süni intellekt texnologiyalarına maraq həm istehlakçılar, həm proqramçılar, həm də korporativ müştərilər arasında sürətlə artır. Bu artan tələbi qarşılamaq üçün isə daha böyük hesablama gücü, genişləndirilmiş paylama infrastrukturu və ciddi kapital yatırımı tələb olunur.

Maliyyələşmənin strukturuna əsasən, 30 milyard dollar SoftBank, 30 milyard dollar Nvidia, 50 milyard dollar isə Amazon tərəfindən təmin edilib. Açıqlandığına görə, OpenAI ilə Amazon arasında strateji tərəfdaşlıq sazişi də imzalanıb. Nvidia isə şirkətə yeni nəsil “inference” – yəni model çıxarımı və real vaxt emal – gücü təqdim edəcək.

Şirkət əlavə edib ki, investisiya turunun növbəti mərhələlərində digər maliyyə investorlarının da prosesə qoşulması gözlənilir. Bu maliyyələşmə OpenAI-nin qlobal AI infrastrukturunu genişləndirməsi, modellərin miqyasını böyütməsi və kommersiya tətbiqlərini sürətləndirməsi baxımından strateji dönüş nöqtəsi kimi qiymətləndirilir.