OpenAI data mərkəzi planını dəyişib

OpenAI öz məlumat mərkəzlərini qurmaq planlarından imtina edərək Microsoft, Amazon və Google kimi bulud texnologiyası nəhənglərindən infrastruktur icarəyə götürməyə qərar verib. Bu dəyişiklik şirkətin mümkün IPO öncəsi xərclərlə bağlı investor narahatlıqlarını artırır.

Stargate layihəsi üzrə planlar azaldılıb

2025-ci ilin yanvarında Ağ Evdə təqdim olunan Stargate layihəsi ABŞ-da dörd il ərzində 500 milyard dollarlıq Sİ infrastrukturu qurmağı hədəfləyirdi. Layihədə OpenAI əsas operator kimi çıxış edirdi.

Şirkət ilkin mərhələdə öz məlumat mərkəzlərini qurmağı və ya icarəyə götürməyi planlaşdırsa da, tikinti gecikmələri, təchizat zənciri problemləri və hələ mənfəət əldə etməyən biznes modelinə görə maliyyəçilərin ehtiyatlı mövqeyi bu planların dəyişdirilməsinə səbəb olub.

Nəticədə isə hesablamalara görə Sİ hesablamalarına yönəldilən xərclər 2033-cü ilə qədər nəzərdə tutulan 1,4 trilyon dollardan 2030-cu ilə qədər 600 milyard dollara qədər azaldılıb. OpenAI artıq AWS, Google Cloud, AMD və Cerebras ilə infrastruktur təminatı üzrə razılaşmalar imzalayıb.

Struktur dəyişiklikləri və strategiya

OpenAI Stargate layihəsini üç əsas istiqamət üzrə yenidən təşkil edib: texniki dizayn, tərəfdaşlıqlar və əməliyyatlar. Bu bölmələrə Intel-in keçmiş rəhbərlərindən olan Sachin Katti rəhbərlik edir.

Şirkətin əvvəlki infrastruktur rəhbəri Keith Heyde vəzifəsindən ayrılıb. Yeni rəhbərlik bildirib ki, maliyyə qurumları texnologiya sektorunda “bum-bust” risklərinə görə daha ehtiyatlı davranır və Sİ sahəsində sürətli tələbatla uzunmüddətli tikinti müddətləri arasında uyğunsuzluq mövcuddur.

Buna baxmayaraq OpenAI-nin ümumi hesablama gücü 2025-ci ildə üç dəfə artaraq 1,9 giqavat səviyyəsinə çatıb. Şirkət Texasda planlaşdırılan genişlənməni ləğv edərək diqqətini digər layihələrə, o cümlədən Oracle ilə Viskonsindəki obyektə yönəldib.

IPO öncəsi investor təzyiqi

OpenAI son maliyyələşdirmə mərhələsində 110 milyard dollar cəlb edərək dəyərini 730 milyard dollara yüksəldib. Şirkət 2026-cı ilin sonuna doğru IPO keçirməyi planlaşdırır və bazar dəyərinin 1 trilyon dollara çatması ehtimal edilir.

Bununla belə investorlar şirkətdən xərclərə daha ciddi nəzarət və gəlirlilik strategiyası tələb edir. Böyük texnologiya şirkətlərinin artan kapital xərcləri fonunda gəlirlərin bu xərcləri nə dərəcədə kompensasiya edəcəyi sual altındadır.

OpenAI rəhbəri Sam Altman üçün əsas çağırış şirkətin rəqib platformalardan infrastruktur icarəyə götürdüyü halda Sİ xidmətləri bazarında rəqabət apararaq davamlı gəlir modelini sübut etməkdir.