OpenAI Norveç data mərkəzi planından imtina edib

OpenAI Norveçdə yerləşən data mərkəzindən birbaşa hesablama gücü icarəyə götürmək planından imtina edib və diqqətini Microsoft ilə mövcud əməkdaşlıq çərçivəsində infrastruktur əldə etməyə yönəldib.

OpenAI Norveçin Narvik şəhərində planlaşdırılan 230 MW gücündə “Stargate Norway” data mərkəzindən hesablama gücü icarəyə götürmə niyyətindən geri çəkilib. Layihə UK əsaslı Nscale adlı Sİ bulud startapı tərəfindən inkişaf etdirilirdi.

Şirkət eyni zamanda Böyük Britaniyada planlaşdırılan oxşar “Stargate” layihəsini də dayandırmışdı.

Microsoft Norveç layihəsində OpenAI üçün nəzərdə tutulan hesablama gücünü öz üzərinə götürüb. Bildirilir ki, şirkət Narvik obyektində 30 000-dən çox Nvidia Rubin GPU-nun yerləşdirilməsini genişləndirir.

OpenAI isə gələcəkdə hesablama resurslarını birbaşa Microsoft-un Azure bulud xidmətləri vasitəsilə icarəyə götürməyi planlaşdırır.

OpenAI nümayəndələri bildiriblər ki, bu qərar maliyyə baxımından daha səmərəli hesab olunur və şirkətin mövcud uzunmüddətli müqavilə öhdəliklərinə uyğun gəlir.

Şirkət daha əvvəl Microsoft ilə 250 milyard dollarlıq xidmət müqaviləsi bağladığını açıqlamışdı.

OpenAI 2030-cu ilə qədər təxminən 600 milyard dollarlıq hesablama xərcləri hədəflədiyini bildirib. Şirkət rəhbərliyi həmçinin infrastruktur öhdəliklərinin ümumilikdə 1,4 trilyon dollara çata biləcəyini qeyd edib.

Mütəxəssislərin fikrincə OpenAI-nin Norveç və Böyük Britaniya layihələrindən geri çəkilməsi Avropada enerji xərcləri və tənzimləmə mühitinin Sİ infrastrukturu üçün əsas risk faktoruna çevrildiyini göstərir.

Bunun əvəzində Microsoft-un genişlənən data mərkəz şəbəkəsi OpenAI üçün əsas hesablama platforması rolunu gücləndirir.