Samsung artıq Cənubi Koreyanın ən dəyərli şirkəti deyil!

Sİ yönümlü çiplərə artan qlobal tələbat Cənubi Koreyanın ən dəyərli şirkəti titulunun 26 il sonra dəyişməsinə səbəb olub. SK Hynix tarixində ilk dəfə Samsung Electronics-i geridə qoyaraq ölkənin bazar dəyəri ən yüksək şirkəti olub.

22 iyun 2026-cı il tarixinə SK Hynix səhmləri 5,6 faiz bahalaşaraq bazar dəyərini 2.080,4 trilyon vona, yəni təxminən 1,35 trilyon dollara çatdırıb. Eyni dövrdə Samsung səhmləri 0,14 faiz ucuzlaşıb və şirkətin bazar dəyəri 2.066,7 trilyon von, yəni təxminən 1,34 trilyon dollar olaraq qeydə alınıb. Beləliklə, Samsung 2000-ci ildən bəri qoruduğu liderliyini itirib. Samsung bildirib ki, imtiyazlı səhmlərin də daxil edildiyi hesablamalarda bazar dəyəri 2.246,4 trilyon von, yəni təxminən 1,46 trilyon dollar təşkil edir.

SK Hynix-in yüksəlişinin əsas səbəbi Sİ sistemlərində istifadə olunan yüksək bant genişlikli yaddaş (HBM) texnologiyasına erkən və ardıcıl sərmayələri olub. 2025-ci il etibarilə qlobal HBM bazarında SK Hynix 61 faiz bazar payı ilə lider mövqedədir. Bu şirkəti 21 faizlə Micron və 17 faizlə Samsung izləyir. SK Hynix Nvidia və Google kimi böyük texnologiya şirkətlərinə Sİ tətbiqləri üçün yaddaş həlləri təqdim edir.

Şirkət üçün bu uğur daha da diqqətçəkicidir, çünki keçmişdə maliyyə çətinlikləri yaşayıb. 2002-ci ildə həddindən artıq borclanma səbəbindən iflas həddinə çatan şirkətin o dövrdə Micron tərəfindən alınması gündəmdə olub, lakin bu baş tutmayıb. 2023-cü ildə isə dünya üzrə yaddaş böhranına görə 7,73 trilyon von əməliyyat zərəri yaşayıb. Lakin Sİ investisiyalarının artması ilə SK Hynix 2024-cü ildə 23,5 trilyon von əməliyyat mənfəəti əldə edərək tarixinin ən yüksək gəlirlilik səviyyəsinə çatıb.

Analitiklər bildirirlər ki, SK Hynix təkcə HBM bazarında deyil, ənənəvi DRAM istehsalında da Samsung-la arasındakı fərqi sürətlə bağlayır. Bankların proqnozlarına görə, Samsung-un aylıq DRAM istehsalı bu il təxminən 691 min yarımkeçirici lövhə səviyyəsində olacaq.