Qətər İranın hücumlarla bağlı iddialarını rədd etdi

Qətər İranın cavab hücumlarında yalnız ABŞ bazaları və obyektlərinin hədəf alındığına dair iddialarını rədd edib. Qətər Xarici İşlər Nazirliyinin sözçüsü Məcid əl-Ənsari İranın hücumlarla bağlı istifadə etdiyi ifadələri tənqid edərək, bu hücumların mülki yaşayış ərazilərini də hədəfə aldığını bildirib. Ənsari vurğulayıb ki, İran əməliyyat məqsədləri üçün hazırlanmış təhlükəsizlik riski qiymətləndirməsindən seçilmiş ifadələrə deyil, Qətərin Birləşmiş Millətlər Təşkilatına (BMT) təqdim etdiyi rəsmi qeydlərə istinad etməlidir.

Qətər 1 mart 2026-cı il tarixli məktubda İran raketlərinin mülki, kommersiya və yaşayış əraziləri üzərindən buraxıldığını, hücumlarda 16 nəfərin yaralandığını və ziyan dəydiyini qeyd edib. 20 iyul tarixli məktubda isə davam edən hücumlarda aralarında bir uşağın da olduğu 3 nəfərin yaralandığı bildirilib. Ənsari İran raketlərinin Qətər ərazisinə birbaşa hücumlarının və 18 martda Ras Laffandakı qaz obyektlərinə təşkil edilən hücumun rəsmi şəkildə sənədləşdirildiyini bildirib.

Ənsari Qətər Silahlı Qüvvələrinin İrana məxsus raket və pilotsuz uçuş aparatlarının qarşısını almasına baxmayaraq, hücumların ciddiliyinin azalmadığını ifadə edib. O bildirib ki, Ras Laffandakı obyektlər həm Qətər xalqına məxsus milli aktivlər, həm də qlobal enerji təhlükəsizliyi baxımından kritik əhəmiyyətli infrastrukturdur. Qətər münaqişənin tərəfi olmadığını, ölkə ərazisinin və mülki infrastrukturun hədəfə alınmasının legitim cavab kimi göstərilə bilməyəcəyini qeyd edib.

İran Xarici İşlər Nazirliyinin sözçüsü İsmayıl Bəqayi isə ABŞ-yə qarşı cavab hücumlarında Qətərdəki ABŞ bazaları və obyektlərinin hədəf alındığını, mülki şəxslərin hədəfə alınmadığını irəli sürüb. Qətərin BMT-yə təqdim etdiyi sənədlərdə də bu vəziyyətin qəbul edildiyi iddia edilib.