Avropa Mərkəzi Bankı yeni avro əskinasları üçün səsvermə başladıb

Avropa Mərkəzi Bankı (ECB) yeni avro əskinasları üçün ictimai səsvermə başladıb. Yeni dizaynlar mədəni irs və təbiət olmaqla iki əsas mövzu ətrafında formalaşıb. Minlərlə müraciət arasından seçilən 10 finalçı dizayn ictimaiyyətə təqdim olunub.

Mədəniyyət mövzusu Avropanın incəsənət, elm və ədəbiyyat tarixini əks etdirən simvolik şəxsləri əhatə edir. Bu dizaynda 5 avroda opera müğənnisi Maria Callas, 10 avroda bəstəkar Ludwig van Beethoven, 20 avroda Nobel mükafatlı alim Marie Curie yer alır. Daha yüksək nominallı əskinaslarda isə 50 avroda Miguel de Cervantes, 100 avroda Leonardo da Vinci, 200 avroda Nobel Sülh Mükafatlı fəal Bertha von Suttner təsvir olunur.

Təbiət mövzusu isə bioloji müxtəliflik və ətraf mühitin qorunmasına fokuslanır. Əskinasların ön üzlərində Avropaya xas quş növləri və çay mənzərələri təsvir edilərkən, arxa üzlərində Avropa İttifaqının əsas qurumları simvolizə olunur. Məsələn, qayalıq sıvacı quşu Avropa Parlamenti, balıqcıl quşu Avropa Komissiyası, arıyeyən quş isə Avropa Mərkəzi Bankı ilə əlaqələndirilir. Ağ leylək Ədalət Məhkəməsini, qılıncdimdik Avropa Şurasını, şimal sümsük quşu isə Hesablama Palatasını təmsil edir.

Sorğunun nəticələrindən sonra yekun dizayn seçiləcək. Qrafik və təhlükəsizlik tənzimləmələri tamamlandıqdan sonra texniki çap prosesinə keçiləcək. Yeni avro əskinaslarının 2026-cı ilin sonunadək mərhələli şəkildə dövriyyəyə buraxılması planlaşdırılır.