Lukoil 12,5 milyard dollar zərər açıqlayıb

Rusiyanın iri neft şirkəti Lukoil 2025-ci ili 1,06 trilyon rubl (12,5 milyard dollar) xalis zərərlə başa vurub. Buna səbəb ABŞ sanksiyaları nəticəsində şirkətin xarici aktivlərini satmağa məcbur qalması olub.

Şirkət açıqlayıb ki, beynəlxalq fəaliyyəti üzrə investisiyalarını, xüsusilə Lukoil International bölməsi ilə bağlı aktivləri balansdan silib. Bu prosesin ümumi dəyəri 1,7 trilyon rubl (20,2 milyard dollar) həcmində qiymətləndirilib.

Lukoil qlobal neft hasilatının təxminən 2%-ni təmin edir və bunun təxminən dörddə biri şirkətin xarici əməliyyatlarının payına düşür.

Qeyd edək ki, şirkət 2024-cü ildə 848,5 milyard rubl (10,1 milyard dollar) xalis mənfəət açıqlamışdı. Lakin 2025-ci ildə baş verən dəyişikliklər nəticəsində maliyyə göstəriciləri kəskin pisləşib.

ABŞ 2025-ci ilin oktyabr ayında Ukrayna müharibəsi fonunda Rusiyaya təzyiqi artırmaq məqsədilə Lukoil-ə qarşı sanksiyalar tətbiq edib. Bu qərar şirkəti 2024-cü ildə dəyəri 22 milyard dollar qiymətləndirilən xarici aktivləri üçün alıcı axtarmağa vadar edib.