Azərbaycanın valyuta ehtiyatları 85.8 milyard dollara çatıb
Azərbaycanın strateji valyuta ehtiyatları 85.8 milyard ABŞ dollarına çatıb. Bu göstərici xarici şoklara qarşı güclü maliyyə buferi yaradır. Bunu Azərbaycan Mərkəzi Bankı sədrinin birinci müavini Dünya Bankının “Azərbaycan üzrə Ölkə İqtisadi Memorandumu – 2026-cı ilin yazı” hesabatının təqdimatı zamanı bildirib.
Geosiyasi gərginliklər, təchizat zəncirlərində fasilələr və iqlim riskləri kimi qlobal çağırışlara baxmayaraq, Azərbaycanın xarici mövqeyi əlverişli olaraq qalır. Maliyyə sektoru dayanıqlılıq nümayiş etdirir: kapital adekvatlığı əmsalı 17%, likvidliyin örtülməsi əmsalı 155%, problemli kreditlərin payı isə 2.9% təşkil edir. Kreditlərin dollarlaşması 13.7%-ə enib, rezident depozitlərinin dollarlaşma səviyyəsi isə 27%-ə düşüb.
Azərbaycan iqtisadiyyatını üç əsas struktur dəyişiklik formalaşdırır. Bunlar qeyri-neft sektorunun artan əhəmiyyəti, artım mənbələrinin tikinti kimi ticarətə çıxarılmayan sahələrdən nəqliyyat, logistika, informasiya texnologiyaları və qeyri-neft sənayesi kimi ixrac yönümlü sektorlara keçməsi, eləcə də iqtisadi artımda dövlət xərclərindən daha çox özəl sektor fəaliyyətinin rolunun güclənməsidir.
Mərkəzi Bankın may ayı proqnozuna görə, Azərbaycanın ÜDM-nin 2026-cı ildə 1.1%, 2027-ci ildə isə 3.2% artacağı gözlənilir. Qeyri-neft sektorunda artımın müvafiq olaraq həmin illərdə 3.2% və 4.7% olacağı proqnozlaşdırılır. İqtisadiyyatın şaxələndirilməsi növbəti inkişaf mərhələsi üçün həlledici əhəmiyyət daşıyır. Turizm isə əhəmiyyətli dərəcədə istifadə olunmamış potensiala malik sektor kimi göstərilir. Son üç ildə turizm gəlirləri illik orta hesabla 38% artıb. Bu artıma hava əlaqələrinin yaxşılaşdırılması, viza prosedurlarının sadələşdirilməsi və turizm istiqamətlərinin daha yaxşı təşviqi təkan verib. 2026-cı ilin birinci rübündə turizm xidmətləri ixracı qeyri-neft xidmətləri ixracının 21%-ni təşkil edib.
Dünya Bankının nəqliyyat və informasiya bağlantılarını gücləndirmək, regional turizm istiqamətlərini inkişaf etdirmək, özəl sektorun iştirakını artırmaq və insan kapitalına investisiyaları genişləndirmək üzrə tövsiyələri Azərbaycanın uzunmüddətli inkişaf prioritetləri ilə üst-üstə düşür.