Çin Mərkəzi Bankı qızıl ehtiyatlarını 75,44 milyon unsiyaya çatdırdı

Çin Mərkəzi Bankı (PBOC) 2026-cı ilin iyun ayında ehtiyatlarına 480 min unsiya qızıl əlavə edərək, 2023-cü ilin oktyabr ayından bəri ən böyük aylıq alışını həyata keçirib. Beləliklə, PBOC-un fasiləsiz qızıl alışı prosesi 20 aya çatıb və bankın ümumi qızıl ehtiyatı 75,44 milyon unsiyaya yüksəlib.

Bu alış qlobal qızıl qiymətlərində kəskin enişin yaşandığı dövrə təsadüf edib. İyun ayında qızıl qiymətləri yüzde 12 geriləyərək unsiya üzrə 4 min dolların altına düşüb və 2008-ci ildən bəri ən sərt aylıq enişini qeydə alıb. Qiymətlərdəki azalmada ABŞ/İsrail-İran müharibəsindən sonra artan inflyasiya riskləri və ABŞ Federal Ehtiyat Sisteminin (Fed) faiz endirimlərinə ehtiyatlı yanaşması təsirli olub. Yüksək faiz gözləntiləri faiz gəliri gətirməyən qızıl üzərində təzyiq yaradıb.

Bu proseslər fonunda Goldman Sachs, Deutsche Bank kimi bir çox beynəlxalq investisiya bankı ilin sonu üçün qızıl qiyməti proqnozlarını aşağı istiqamətdə yeniləyib. Analitiklər yüksək faiz mühitinin qısa müddətdə qiymətli metallar üzərində təzyiqi davam etdirə biləcəyinə diqqət çəkirlər.

Buna baxmayaraq, rəsmi sektorun qızıla tələbi güclü qalmaqda davam edir. Dünya Qızıl Şurasının 2026-cı ilin iyun ayında dərc etdiyi sorğuya görə, qarşıdakı 12 ay ərzində qızıl ehtiyatlarını artırmağı planlaşdıran mərkəzi bankların nisbəti indiyədək ən yüksək səviyyəyə çatıb. Bu vəziyyət mərkəzi bankların bazarlardakı dalğalanmalara baxmayaraq, qızıla marağını qoruduğunu göstərir.