İngiltərədə inflyasiya iyunda 2,6 faizə düşüb

İngiltərədə illik inflyasiya 2026-cı ilin iyun ayında 2,6 faizə geriləyərək 2025-ci ilin martından bəri ən aşağı səviyyəni qeydə alıb. Gözləntilər inflyasiyanın 2,7 faiz səviyyəsinə düşəcəyi yönündə idi. May ayında illik inflyasiya 2,8 faiz olub.

Aylıq əsasda istehlak qiymətləri iyun ayında 0,1 faiz artıb, may ayındakı artım isə 0,2 faiz təşkil edib. Aylıq artım gözləntilərə uyğun olub. İnflyasiyadakı yavaşlama nəqliyyat qiymətlərində artım tempinin zəifləməsi ilə bağlı olub. Nəqliyyat inflyasiyası mayda 6,8 faiz olduğu halda, iyunda 5,7 faizə düşüb. Ən böyük azalma motor yanacağında müşahidə edilib. Dizelin qiyməti may-iyun arasında litr üçün 10,7 peni azalaraq 176,4 peniyə enib. Benzinin qiyməti isə eyni dövrdə litr üçün 2,1 peni düşərək 155,3 peni olub.

Ərzaq inflyasiyası da iyun ayında azalaraq 1,7 faizə geriləyib və 2024-cü ilin avqustundan bəri ən aşağı səviyyəyə çatıb. May ayında ərzaq inflyasiyası 2,2 faiz səviyyəsində idi. Ərzaq qiymətlərindəki azalmada şəkər, mürəbbə, şərbət, şokolad və qənnadı məhsullarının ucuzlaşması təsirli olub. Alkoqol və tütün məhsullarında illik inflyasiya 2,4 faizdən 2,1 faizə enib.

Geyim və ayaqqabı qiymətləri maydakı 0,2 faizlik artımdan sonra iyun ayında 0,5 faiz azalıb. Mebel və ev əşyalarının qiymətlərində isə 0,1 faizlik artım 0,2 faizlik azalma ilə əvəzlənib.