Vyetnam iqtisadiyyatı 2025-ci ildə 8,02% böyüyüb

Vyetnam iqtisadiyyatı 2025-ci ildə 8,02% artaraq 2011-ci ildən bəri ikinci ən yüksək illik artım tempinə nail olub. Bu nəticə ABŞ-ın avqust ayından etibarən tətbiq etdiyi qarşılıqlı tariflərə baxmayaraq əldə edilib.

Xidmət sektoru 8,62% artımla əsas aparıcı olub və ÜDM-in 51%-ni təşkil edib. Sənaye və tikinti sektoru 8,95% böyüyərək iqtisadiyyatın 44%-ni formalaşdırıb. Kənd təsərrüfatında artım 5,3% səviyyəsində olub.

Dördüncü rübdə iqtisadi artım illik ifadədə 8,46%-ə yüksəlib ki, bu da 2021-2025 dövründə ən güclü rüblük göstəricidir. Bu dinamika illik ÜDM-i 514 milyard dollara, adambaşına düşən gəliri isə 5 026 dollara çatdıraraq Vyetnamı “yuxarı-orta gəlirli ölkə” kateqoriyasına yaxınlaşdırıb.

ABŞ tariflərinə baxmayaraq ölkənin ABŞ-a ixracı rekord həddə 153,2 milyard dollara çatıb və 28% artım göstərib. İyulda 40%-dən 20%-ə endirilən tariflər fonunda ABŞ-la ticarət profisiti 33,6 milyard dollar olub. Ümumi ticarət dövriyyəsi 930 milyard dollara yüksəlib. Birbaşa xarici investisiyalar 27,6 milyard dollar təşkil edib, sənaye istehsalı və pərakəndə satış 9,2% artıb, inflyasiya isə 3,31% səviyyəsində qalıb.

Analitiklərin fikrincə güclü daxili istehlak, infrastruktur xərcləri və ixracın şaxələndirilməsi tarif risklərini kompensasiya edib. Hökumət 2026-cı il üçün 10%-dən yüksək iqtisadi artım hədəfləyir ki, bu da qlobal qeyri-müəyyənlik fonunda ASEAN ölkələri arasında ən iddialı məqsədlərdən biridir.