Mikayıl Cabbarov Dünya Bankı rəsmisi ilə görüşüb

Azərbaycanın iqtisadiyyat naziri Mikayıl Cabbarov 20 may 2026-cı il tarixində Bakıda keçirilən Dünya Şəhər Forumunun 13-cü Sessiyası (WUF13) çərçivəsində Dünya Bankı Qrupunun infrastruktur üzrə vitse-prezidenti Valérie Levkov ilə görüşüb. Görüşdə Azərbaycan və Dünya Bankı Qrupu arasında uğurlu əməkdaşlıq, xüsusilə iqtisadi inkişafa və dayanıqlı urbanizasiyaya töhfə verən infrastruktur layihələri diqqətə çatdırılıb.

Müzakirələr Azərbaycanda və ətraf regionda infrastruktur inkişafının dəstəklənməsinə, özəl sektorun maliyyələşdirilməsini gücləndirmək üçün Dünya Bankının maliyyə alətlərindən istifadəyə və şəhərsalma layihələrində əməkdaşlıq imkanlarının araşdırılmasına yönəlib. Hər iki tərəf Dayanıqlı İnkişaf Məqsədlərinə uyğun layihələrin həyata keçirilməsinin regionun iqtisadi və sosial inkişafını əhəmiyyətli dərəcədə irəli aparacağını vurğulayıb.